اعرفي أنواع وأسعار الفوط الصحية وتقييمها


عدد المشاهدات : 581
تاريخ الخبر : 11-1-2018 

بواسطة

ندى بديوي

"الفوط الصحية" هي المنتج الشهري اللي مفيش واحدة فينا بتستغنى عنه، لها أنواع كتير واختيار النوع المناسب مش رفاهية لأن النوع الغلط بيسبب مشاكل جلدية والتهابات في منطقة البيكيني اللي بشرتها حساسة جدًا ومهم العناية بيها.. جمعنالكم أسعار وأهم أنواع الفوط الصحية، وقيمنها حسب آراء عدد من المستخدمات..


*الأسعار ممكن تزيد أو تقل جنيه أو اتنين حسب المكان.

- أولويز ماكسي/ ماكسي الليلية


8 فوط بـ 11 جنيه
ده من أشهر أنواع أولويز، فوط كثيفة للأيام الأولى من البريود خصوصًا، هي الاختيار الأول لكتير من اللي اتكلمنا معاهم، ومناسبة أكتر لفترات الليل. عيوبها..السماكة خصوصًا مع الملابس الضيقة، وإنها سببت حكة لكتير من المستخدمات.


- أولويز القطنية


12 جنيه وبعد العرض بـ7.50
دي مختلفة في إن الطبقة الخارجية مصنوعة من القطن مش زي باقي منتجات أولويز، المفروض إنها علشان البشرة الحساسة وفيها مرطب، هي ناعمة لكن التسريب فيها أكتر من الأنواع التانية.. وأكتر كلمة اتقالت عنها "بتكلكع" وإن كانت ناعمة فعلًا وبتقلل الحكة.

-أولويز ألترا


7 فوط بـ 15 جنيه
رقيقة جدًا مش بتحسي بيها، وكانت اختيار عدد كبير من اللي بيقضوا فترات طويلة برا البيت، لأنها أقل في التسريب وخفيفة ومابتكلكعش.. لكن مشكلة الحكة كانت متكررة برضه.

-أولويز ألترا الماسية


7 فوط بـ15 جنيه
بتجمع مميزات كل أنواع أولويز، بإنها رقيقة وطويلة جدًا وبتوفر حماية ليلية أكبر.

-برايفت


9 فوط بـ 11 جنيه
مصنوعة من القطن وغير مسببة للحكة. مشكلة الحجم والكلكعة كانت جزء من تقييم عدد من المستخدمات، لكنهم اختاروها كأفضل نوع في الأيام الأولى بفضل سماكتها.

-برايفت ألترا


7 فوط بـ 15 جنيه
بتجمع بين كونها رقيقة وفي نفس الوقت قطنية ومابتسببش الحكة، بالإضافة لإنها عملية ومابتكلكعش.

- سوفي ماكسي


8 فوط بـ 10 جنيه
فوط سميكة قطنية، ضد الحكة ومناسبة للأيام الأولى، لكن حجمها زي كل أنواع الفوط الماكسي.

- سندريلا العادية/ الماكسي


العادية 9 جنيه/ الماكسي 10 جنيه
فوط طويلة قطنية غير مضغوطة، معظم المستخدمات قالوا إن مشكلتها التسريب بشكل كبير وإنها مابتوفرش حماية خصوصًا للي بيقضوا وقت طويل برا البيت.

 

-الفوط اليومية "كير فري"


20 فوطة بـ25 جنيه
فوط رقيقة جدًا بحجم صغير، بتستخدم للنظافة الشخصية، وبتحمي من الإفرازات خصوصًا.



الأكثر مشاهدة

خمس حواس