كيف تساعدين أصدقاءك المحبطين والمعرضين للاكتئاب؟.. إليك 13 طريقة


عدد المشاهدات : 498
تاريخ الخبر : 1-1-2018 

بواسطة

هدير حسن

كتير مننا بيعدي بأوقات حزن وغضب، وبيحس معها أن الدنيا وقفت والحياة انتهت على كده، أيا كانت المشكلة أو المشاكل اللي بيمر بيها الشخص، لكنه بيكون في حاجة لدعم ومساندة.

ولما يكون ده دورِك كصديقة أو حبيبة، فلازم تعرفي الطريقة المناسبة عشان تكوني بجانب أصدقائك في لحظات يأسهم وحزنهم، وإيه اللي المفروض تعمليه عشان يكون دعمك فعال وله نتيجة إيجابية عليهم.

دي مجموعة من النصايح اللي هدفها تساعدك وتساعد اللي بتحبيهم يمروا بازماتهم من غير أذى نفسي.

  1. في حالة الإحباط والحزن، الأصدقاء بيكونوا محتاجين أشخاص يقدروا يثقوا فيهم، وإذا قررت تساندي صديقك\ صديقتك، لازم تتأكدي أنك هتكوني موجودة معاهم للنهاية.
  2. أكيد وجودك معاهم مهم ليهم، لكن لازم كمان تحترمي مساحتهم الخاصة، إذا قرروا أنهم عاوزين يقضوا شوية وقت مع نفسهم، فلازم تقدري ده مهما كان خوفك عليهم، لأنه لو أصريتي على وجودك في وقت هما عاوزين يكونوا فيه مع نفسهم هتضايقيهم أكتر.
  3. الشخص وهو متضايق ومحبط مش محتاج نصايح مجدنية وجاهزة من أي حد، فصحوبيتكم مش معناها أنك تنصحيه لأنه هو اللي بيمر بالتجربة وعارف هو محتاج إيه، فمتديلوش نصيحة إلا إذا طلبها.
  4. حاولي أنك تبعدي عن الكلمات والمواقف اللي ممكن تفكرهم بذكريات مؤلمة أو تعيسة.
  5. "والله ده أنا كمان عندي مشاكل، ودنيتي ملخبطة" يمكن دي أسوأ جملة ممكن تقوليها، لأنه كده مش بتخففي عنه، يمكن تكوني بتزودي تعاسته لأنك خليتي الموقف يدور حواليكي، وكأنك مش مهتمة بمشاكله، فيفضل في الوقت ده تركزي اهتمامك على صديقك بس.
  6. حاولي تدوري على الحاجات اللي بتسعدهم واعمليها، يعني لو هو بيقدر يفرغ الطاقة السلبية في الأكل، ممكن تجربوا مطعم جديد، أو السفر، نوع معين من الموسيقى أو التنظيف أو الرياضة، المهم تحاولي تقدمي المساعدة.
  7. لما تكوني محتارة، ومش عارفة إيه اللي ممكن يسعده أو يساعده، ببساطة، اسأليه عن تعملي إيه عشان تقدري تساعديه، ولازم تعرفي أنك شخص مش متخصص زي الطبيب النفسي، وأنه دورك المساندة بس.
  8. متقلليش من مشاعرهم أو تعتبري مشكلاتهم تافهة، هي ممكن تكون كده بالنسبة لك، لكن بالنسبة لهم هي كبيرة وبتأذيهم.
  9. الأفضل، أنك تحاولي تبحثي بشكل معمق عن الاكتئاب والقلق وأسبابهم، وإزاي تقدمي مساعدة للأشخاص المكتئبين، عشان تقدمي لهم مساعدة هما فعلا محتاجينها.
  10. اوعي يكون طريق العادات غير الصحية هو وسيلتك للمساعدة، فمثلا إذا قرروا أن السجاير أو الشرب هما الحل، لازم ترفضي ده وتوجدي بدايل تانية، لأنه المكتئب بيكون عرضة لإدمان أي شئ.
  11. حالتهم بتبقى شبه الشخص اللي وقع في حفرة ضلمةن ومش شايف أي إيجابيات في نفسه او في الحياةن خليكي نقطة الضوء، وفكريهم دايما بنقاط قوتهم وصفاتهم الجيدة.
  12. لازم تكوني مستعدة لأسوأ السيناريوهات اللي ممكن تحصل، الشخص ده ممكن يعرض نفسه للخطر وللانتحار مثلا، عشان كده استعدي وحاولي يكون عندك حلول وطرق للخروج من المشكلة.
  13. للأسف، الموضوع محتاج صبر، فلازم تكوني واثقة من انه عندك نفس طويل تقدري تتحملي بيه اللي هيحصل لآخر نفس.

مترجم



الأكثر مشاهدة

خمس حواس