حسناء خميس تكتب: فلانتين سيتي ستارز!

اول معرفتي بالفلانتين كان من خلال فيلم اجنبي كانت البنت في اليوم ده بتلبس فستان احمر حلو ومبهج جداً والناس تيجي تشتري ورد وهدايا وهي فعلاً مبسوطة بعيدا عن اي احداث في العالم عشان المفروض ده يوم مقدس الناس فيه تحب وتتبسط بس وكل الناس في الشارع بتهني بعض عشان العيد المبهج وانا فعلاً قعدت كتير احلم باليوم اللي هحتفل فيه وهلبس فستان حلو واعمل شعري والناس من حواليا مبسوطة وبهجة في كل حتة وناس ماشية توزع ابتسامات وبلونات طايرة.. بس اتصدمت بالواقع لما رحت سيتي ستارز في الفلانتاين لقيت الناس نوعين ، الاول ناس لبسه احمر في احمر وبيتدارو في اللي ماشيين معاهم وبيحاولو يدارو الدبدوب بجهد عظيم، وناس تانيه بتتريق على نص الدبدوب اللي باين . الصورة اللي كانت بتظهر في دماغي لما حد يقول فلانتين اتحولت انا مش بحتفل بيه ولا هحتفل مع اني فعلاً شايفاه من اكتر الحاجات المبهجة في الدنيا بس مبقولش على النت .. اصل ليه هحط نفسي في موضع سخرية انا في غنى عنه ! وهنا بقى ده ملخص مصر انت عادي ممكن تعيش في مصر ويبقى عندك حرية نمشيها يوماً ما هتكون مستقل عادي عندك واسطة فابتشتغل وتقبض كويس ماااشي !لكن هنا احنا بنفقِد اي حاجة بهجتها ولازم نبين اد ايه احنا اعمق من كده واهم من التفاهات دي عيد حب ايه بس!وحتى لو جينا على نفسنا واحتفالنا بيه بدل ما نحتفل بيه بحب عشان هو فعلاً حاجه مبهجة بنعملها على سبيل الواجب واحنا مستتقلين كده انا فعلاً نفسي اسافر عشان احتفل بالفلانتين وانا مش مكسوفة من غير ما حد يتريق عليا عايزه أقول اني بحب الدباديب من غير ما يتقال عليا زي البنات التافهة هو ايه اللي ربط التفاهة بالدباديب اصلاً! ايه المشكلة ان احنا فعلاً نتبسط باليوم ده وبالورد وحتى نلبس احمر وتاني يوم عادي نروح الشغل والجامعة وهنفضل بنذاكر وعندنا حلم وهدف الهدف من الدنيا اصلاً انك تكون مبسوط اياً كان ايه اللي بيبسطك فهو مهم مش تافه لأنه بيوصلك لهدفك في الدنيا كل عيد حب وانتو مبسوطين