"أنا عمرى ما هضحى عشان حد " جملة كلنا بنقولها قبل ماندخل فى تجربة , بنقولها لصاحبتنا اللى بنشوفها بتضحي بكل حاجة عشان حبيبها , خطيبها أو جوزها , بنقولها لما نشوف أمهاتنا بيضحوا عشانا , بنقولها من غير ما نفكر احنا فعلا هنعمل كده و لا ده مجرد كلام لأننا مادخلناش التجربة , ماعيشناش اللى كل اللى حوالينا دول عاشوه . فى الحقيقة إحنا فى كل الأحوال هنضحي طالما بنحب.

هى معادلة فى الأول و الآخر طالما فى حب يبقى فى تضحية يعنى أبسط الأمثلة لو إنتى بتحبى الأكل هتضحى بجسمك اللى ممكن يتخن و العكس صحيح , ده معناه ان مفيش علاقة حب خالية تماما من التضحية , هتلاقى نفسك بتضحى بميعاد نومك عشان تسهرى تتكلمى معاه , هتلاقى نفسك ساعات بتضحى بقعدات حلوة مع اصحابك عشانانتى حابة تقعدى معاه , هتلاقيه بيضحى بالفرجة على الماتش عشان يتكلم معاكى , هتلاقيه بيضحى بالقعدة على القهوة مع

اصحابه عشان يقعد معاكى , هتلاقى مامتك بتضحى و تعمل لكل واحد الاكل اللى بيحبه و هى مبسوطة و مش متضايقة غصب عنك هتلاقى نفسك بتضحى بس ساعتها مش هتحسى إنك بتضحى لإنك ببساطة بتعملى ده بدافع الحب , لكنالتضحية ليها حدود فى الاول و الاخر , يعنى مستقبلك ماينفعش تضحى بيه , قرارتك المهمة ماينفعش تضحى بيها , علاقاتك بالناس ماينفعش تضحى بيها , شخصيتك , عقلك , تفكيرك و نظرتك الخاصة للحياة دى كلها حاجات ماينفعش تضحى بيها , خليكى دايما فاكرة إن التضحية موجودة لكن مش كل حاجة ينفع تضحي بيها .