نورا بركة تكتب: كلنا مدام سهام !

الشخصية اللي بتقوم بيها صفاء الطوخي في مسلسل ‫#‏سقوط_حر‬ كأم لملك أو نيللي كريم

مدام سهام ، موجهة التربية والتعليم الشخصية العصبية ، الصارمة ، القاسية بتاعة القوانين والقواعد
اللي لما دخلت القسم وبنتها مقبوض عليها مخدتهاش في حضنها ، لأ سألتها عملتي إيه ؟!
الست دي سألتها عملتي إيه لأنها بتخاف من الغلط أكتر ماهي خايفة على بنتها أو على نفسها
الست دي طوال سنين ترملها ورعايتها لبنتين ، اتعلمت تخاف من الناس وتعملهم حساب
اختارت لنفسها نموذج الست اللي جوزها مات فقفلت على نفسها بابها وربت بناتها ومحدش سمع لها صوت . وعملت ده جدا لدرجة إنها مش بس نسيت نفسها كأنثى ومتجوزتش ، دي كمان نسيت لمسة الأنثى في أمومتها
لا حضنتهم ولا كانت حانية عليهم ولا رقيقة معاهم .. بالظبط زي ماقالت في حوار المسلسل " البيت اللي مفيهوش رجالة ، لازم كل ستاته يبقوا رجالة "
زي ماكان لازم تاخد الدرجة النهائية في نظرة الناس ليها فترضى عن نفسها ، علمت بناتها انهم لازم ياخدوا الدرجة النهائية في نظرة امهم ليهم ونظرة الناس ليهم .
والنتيجة إن بنتها الكبيرة في مصحة نفسية وقتلت أختها ..

كل مدام سهام ، كل ست محتاجة بس تتساااااب في حالها ، تتساب حرة
الحرية بتخلي الست قادرة تعيش وقادرة تربي أجيال قوية وحرة
بطلوا تلاحقوا كل إنثى بعينيكم ولسانكم وتدخلاتكم واتهاماتكم المسبقة ، هيعرفوا ياخدوا بأيد ولادهم وبناتهم ويطلعوهم أسوياء
كفاية بقى تخريب . كفاية تجريف لحياة الستات وأطفال الستات
( كفوا أيديكم عن النساء )