نورا بركة تكتب: نرمين و ونوس !

نرمين من أول حلقة ، بنشوفها في البيت منكوشة وعينيها زايغة وبرا البيت محجبة باهمال وباهتة وبرضه عينيها زايغة . برا البيت بنشوفها بتجري بابنها من دكتور لشيخ لدجال يابتسمع نصيحة ووصفة من زميلتها ، مغمضة عينها مفتحاها كل اللي نفسها فيه تشوف ابنها المشلول ماشي على رجليه .

ونوس ساعد ابنها يخف ، نرمين شافت ابنها بيجري قدامها بقى كل همها دلوقتي أنه يفضل كده ومينتكسش خصوصا انه انتكس مرة قبل كده ، فمعندهاش مانع تعمل أي حاجة وكل حاجة في سبيل ده .

نرمين اتعلمت السحر على إيد ونوس ، وابتدت تأذي كل اللي شايفه أنهم بيأذوا ابنها كحماية ليها ، بتعمل كده وهي لابسه سبح كتيير وبتقول " الله عدل " والبادي أظلم.

نرمين بقت بتجي لها نوبات تشنج وأمها وعيلتها شايفينها اتجننت !

نرمين مبقتش كده في يوم وليلة !

نرمين بنت ياقوت وانشراح ، اللي أبوها ساب أمها وسابهم أكتر من عشرين سنة ماتعرفش عنه حاجة .

نرمين اشتغلت واتجوزت زي كل البنات وخلفت ولد جميل .

نرمين يمكن عصبية زي أمها ماقالت لها ،جوزها ما استحملهاش أو يمكن هي اللي ما استحملتش .المهم أنها اتطلقت ورجعت بيت أمها بابنها .

نرمين ابنها اتشل وقعد على كرسي متحرك .

نرمين طليقها ما سألش عنها ولامرة ولا عن ابنها وهي سكتت ، معرفش ان ابنه مشلول وهي جريت بالولد.

نرمين عرفت أن طليقها اتجوز وخلف ، ولسه ماسألش عنها ولاعن ابنها وسكتت .

لاشفناها بتشتكي من مشاكل شغل ولانقص فلوس ولاغيره .

نرمين شافت إنها وإن إبنها  وجهين لعملة واحدة . العملة دي مهملة ويمكن مرفوضة كمان ، ما أبوها سابها وجوزها سابها وابنها أبوه سابه !

العالم كله بقى  بالنسبة لنرمين أشرار عايزين لها السوء هي وابنها ، يابيحسدوا يا بيعملوا أسحار ،محدش عايز لها الخير .

زي ماقالت لأمها في Master scene  بعد زيارة طليقها لابنها وهي بتزق أمها وبتوقعها ع الأرض وبتصرخ وبتقول : " غووورري .. كلكم ضدي .. كلكم بتحاربوني .. منك لله "

نرمين باختصار اتنقلت من ألم لألم ، ومن وجع لوجع ومفيش وجع منهم اتطيب واتعالج

تكرار الألم يعمل أكتر من كده ويودي لأخطر من كده !

مش مبرر طبعا لأي أخطاء وجرايم في الحياة .

بس ليه احنا بنتفرج على بعض في نوبات ألمنا ساكتين ومسلمين وممكن متجاهلين !

ليه بنقتل في نفوسنا صراخنا ووجعنا ونعدي من وجع للتاني من غير علاج !

ماهو زي ما الجسم بيعتل ، النفس كمان بتعتل

والنفس لما بتعتل بتبقى صيدة سهلة لونوس الانس وونوس الجن ، ونرجع نستغرب إيه اللي حصل وليه !!

خافوا على نفوسكم وعلى حبايبكم شوية

خافوا من الألم اللي ما بيطيبش !!