”أفلامك وبطانيتك”.. وهنقولك إزاي تقضي ”ليلة رأس السنة” لوحدك

محدش بيفضّل يقضي اليوم ده لوحده، لكن لو اضطرتك الظروف وكنتِ عايشة لوحدك، فده معناه أنك هتقضي "ليلة رأس السنة" مع نفسك، سواء كنتِ معجبة بده أو متضايقة، لازم تلاقي طريقة تستمتعي بيها، وتعيشي وقت سعيد، حتى لو كنتِ وحيدة.

في البداية، اتعاملي مع الموضوع بطريقة ممتعة، وانظري له بطريقة إيجابية، ومتعتبريش وجودك لوحدك في يوم زي ده حاجة سلبية، بالعكس تعاملي معاه على أنه ميزة، كأنك بتعرفي نفسك لأول مرة، وفرصة تحطي خططك وتحددي موقفك من السنة اللي فاتت، وتستعدي للسنة الجديدة.

"احكي" جمع لك كذا طريقة، تقدري بيها تستمتعي برأس السنة، وأنت لوحدك:

• للناس اللي بتحب البيت والدفا، ممكن يحملوا أفلام ومسلسلات بيحبوها، وأكلة لطيفة، وكده الليلة خلصت.
• مش كله بيحب الأفلام، فممكن يبقى كتاب جديد، أو مزيكا لطيفة.
• ممكن تقضي الوقت تكتبي اللي حققتيه السنة اللي فاتت، وبتتمني تحققي إيه في السنة الجديدة.
• وأنتي بتفكري في السنة الجديدة، شوفي مين اللي تحبي يكون موجود معاكي فيها من الأصحاب والقرايب، وكلميهم وعيدي عليهم، وقولي لهم "شكرا".
• لو متعودة تطبخي طول السنة، فلازم تدلعي نفسك الليلة دي، وتجيبي أكلة جديدة وغالية، كأنك بتكافئي نفسك.
• أما لو الطبخ ده حاجة بعيدة عن اهتماماتك، حاولي اليوم ده تجربي تأكلي من إيديك، دوري على وصفة جديدة على الإنترنت، واعمليها لنفسك.
• اكتبي كل الحاجات الوحشة اللي حصلتلك على ورق واحرقيه، كأنك بتتخلصي منه.
• غيري ترتيب غرفتك أو أي جزء في البيت، وضيفي شئ جديد، أو اتخلصي من حاجة قديمة، ومتنسيش تزيني أي ركن بزينة السنة الجديدة.
• اشتري لنفسك حاجة، ممكن تكون طقم جديد، أدوات ميك أب، أو إكسسوارات.
• حاولي تجربي حاجة مختلفة عن طبيعتك.. ممكن تروحي لمكان جديد، مش خروجة، لكن حي جديد مزورتيهوش قبل كدة، اختاريه بطريقة عشوائية، ودوري على المواصلات للوصول ليه، وخدي فيها جولة واتمشي واتفرجي على المكان.
• لو بتحبي الألعاب، ممكن تزلي لعبة جديدة على الموبايل وتسهري عليها أو تشتري لعبة جديدة على البلاي ستيشن.
• اتمشي على النيل، أو روحي حديقة قريبة.
• اشتري هدايا بسيطة، واستني الساعة 12 تدق في الشارع، ووزعيها على الأطفال والناس، لما تسعدي غيرك هتحسي بالسعادة.

الطرق عشان تسعدي نفسك كتيرة، وأنتي اللي تقدري تحدديها بنفسك، لكن إحنا حاولنا نساعدك، المهم تكون سنة سعيدة.