إزاي تتخلصي من مُشكلة ”الكدب” عند إبنك\بنتك في خطوات ..

الكدب زي ما كلنا عارفين "عادة سيئة جدًا" وبتخلي الناس دايمًا تنفر من الشخص إللي بيكدب حتى وإن كان شخص كويس جدًا والمُشكلة دي بتبدأ في الظهور من سن الطفولة وعشان كدة إعرفي إزاي تتخلصي من المُشكلة دي عند إبنك\بنتك من بدايتها وبالخطوات :

1- إبني علاقة صداقة مع إبنك\بنتك ومتحسسيهمش إنك مراقباهم لأن دة أولًا بيخلي الطفل ثقته بنفسه تتهز وثانيًا يخاف منك ونتيجة الخوف دة يبتدي يكدب .

2- تجنبي جُملة " الكداب بيروح النار" و جُملة "ربنا هيغضب عليك " لأنك بكده بتخلي طفلك  يكدب لأنه خايف و بتخلقي كمان جواه رُهاب من ربنا بدل ما يحبه ودي مُشكلة كبيرة جدًا  .

3- تجنبي المُقارنة بين طفلك وبين إللي في سنه  لأن المُقارنة دايمًا بتخلي الطفل شايف نفسه دايمًا غلط  لإنه شايفك دايمًا مش راضية عنه ودة بيخليه يعمل أي حاجة عشان يرضيكي وبيضطر في النهاية إنه يخبي إللي بيعمله أو يكدب عليكي.

4- في جملة دايمًا الأبهات والأمهات بيقولوها لولادهم وهي " إن شاء الله " وبتتقال غالبًا لما يبقى الأب والأم  مُتأكدين إنهم مش هيعملوا الحاجة دي ومع ذلك بيوعدوا ولادهم بيها ودة بيخلق جواهم نوع من عدم الثقة في الأهل ودة في حد ذاته شيء بيدعو للكدب في النهاية،بمعنى أوضح الطفل بيشوف مثله الأعلى نفسه بيكدب فبيبتدي يقلده ودة مش شيء كويس.

5- وأخيرًا تجنبي تتصرفي مع طفلك وكأنه كائن غبي وإنتي إللي دايمًا صح لإن الأطفال عمومًا وأطفال الجيل ده على وجه الخصوص ممكن يكونوا أكثر إطلاع منك فمتحاوليش تقللي من طفلك لإن ده بيقلل ثقته بنفسه وبالتالي بيبقى دايمًا محتار يتكلم معاكي في الموضوع بشكل مُباشر أيًا كان الموضوع ولا يكدب وبيختار في النهاية إنه يكدب لإنه دة الخيار الأسهل بالنسباله.