”المسكنات بتجيب عقم.. متستحميش”.. 9 خرافات عن ”البريود”

لأنه الكلام عنها دايما بحساب ومن تحت لتحت، وعلى المتغطي، فمعلوماتنا عن "الدورة الشهرية"، أو زي ما بنسميها "البريود"، قليلة ومش علمية، وفي الأغلب مش صح.

لما بتيجي لأول مرة، تبدأ الأم تفهمك بنفس الطريقة اللي هي عرفتها بيها، وبيكون كلامها في الوقت ده هو مصدر الثقة الوحيد، ممكن يكون صح، لكن كمان بيبقى معاه كده شوية "خرافات"، وأفكار خزعبلية غير منطقية عن "البريود".

الأفكار دي والدتك ورثتها من والدتها، فغالبا ممكن تكون مش علمية وفيها حاجات كتير غلط، ولما بتكبري بتفهمي ده. "احكي" قرر يجمع لك "الخرافات" دي عشان تتخلصي منها، ومتقوليهاش لبناتك كمان.

• متنطيش جامد ومتفتحيش رجلك.

• متستحميش، خصوصا أول يوم "جسمك مفتح".

• بلاش فوط صحية عشان بتعمل حساسية "استعملي قماش".

• المسكنات غلط "الرحم هيبقى أحسن لو سيبتي الألم".. "المسكنات بتجيب عقم".

• وفي تقاليع غريبة "أول ما جاتلي البريود، واحدة قريبة ماما قالت لي أحضن أي عمود في الشقة 3 مرات عشان تجيلي 3 أيام بس".. وطبعا الكلام ده محصلش.

• الدم الكتير معناه أني مش هخلف لما أتجوز.

• وأنتي عندك البريود مينفعش تسلمي على قرايبك الولاد.

• ومينفعش تشوفي الميت وهو بيتدفن أو تدخلي على واحدة حامل.

• وتلاقي اللي بتقولك "ما تقوليش قدامي إنها عندك لحسن تيجلي".

عرفناها عشان نخلص منها، ومنرددهاش وخلاص.