4 أماكن عشان تبيعي وتتخلصي من الزيت والقمامة

كلنا بنتخلص من القمامة وباقي أي طعام بالطريقة التقليدية، نرميها من غير ما نفكر إننا ممكن نستفيد منها بطرق كتير، ونعيد استخدامها، ونكسب منها فلوس كمان.

دلوقتي، من الممكن أنه نتخلص من الزيت الفائض عن حاجتنا، أو الزجاجات والأواني البلاستيك، والورق والكارتون وعبوات الكولا المعدنية، وده لأنه في أماكن بتسعى للحصول على البواقي دي وتستخدمها في إعادة التدوير.

مترميش القمامة تاني، وبيعها واستغليها بالطريقة الصح، ودي مجموعة من الأماكن اللي ممكن تستعيني بيها عشان تتخلصي من القمامة والنفايات بطريقة مربحة.

بيئة

مشروع متركز بالأساس في منطقة حدائق الأهرام، وبيشتغل عن طريق تطبيق على الموبايل، وبعد تسجيل بياناتك، الشركة بتسلمك إما 30 كيس شهريا، في حالة اختيار عدم الفصل بين أنواع القمامة، أو لونين من الأكياس يوميا، في حالة اختيار الفصل ما بين العضوي وغير العضوي. وبيقوم المندوب بوزن كل كيس وإضافة قيمته على التطبيق.

تقدروا تعرفوا أكتر عن الشركة وطريقة التواصل من هنا.

زبالة ستور

مؤسسة آدم للتنمية الإنسانية قررت إنها تحول "الزبالة" لسلعة بتتباع وناس بتشتريها، فعملت زبالة ستور اللي الناس تقدر من خلاله تتخلص من العبوات الفارغة للمياه المعدنية والمشروبات الغازية وزيت القلي المستخدم، وكاوتش السيارات الهالك، وورق الصحف والكارتون، وبتشتري كل سلعة من العملاء حسب سعرها، وهدفها توفر موارد مالية لتعليم أبناء البدو المصريين.

بتسجلي بياناتك وتتواصلي معاهم عن طريق صفحتهم على "فيسبوك" من هنا.

جرين بان

مشروع متخصص في التخلص من الزيت، بتشتركي فيه عن طريق ملء الاستمارة من هنا، وبيبدأوا في التواصل معاكي، وفي مندوب بيستلم منك الزيت المستعمل.

الهدف هو تحويل الزيت لمصدر للطاقة ولصناعات أخرى، وللتواصل معاهم من هنا.

بيكيا

فكرة المشروع قائمة على المبادلة، بمعنى أنك بتفصلي القمامة، وتتواصلي مع إدارة المشروع لتحديد ميعاد مناسب، وتستبدلي قمامتك بسلعة تانية أنتي محتاجاها.

عشان تعرفي عنهم أكتر من هنا.