إزاي تتصرفي مع تسرب الغاز؟

في أوقات ممكن تنسي مفتاح الغاز في البوتاجاز من غير ما تولعيه، أو تشمي رائحة غاز وأنتي مش عارفه مصدرها الحقيقي، وبتحسي بالقلق من أن التسرب ده يؤدي لعواقب أكبر، ويسبب لك أو لأي حد في البيت الاختناق، وأنتي مش عارفه تتصرفي معاه إزاي؟

التعامل مع الغاز محتاج خبرة وتوعية، خاصة، للمتزوجات من فترة قريبة، وعشان كده "احكي" سأل أم وربة بيت إزاي ممكن تتخلصي من رائحة الغاز وتوقفي التسرب لما يحصل؟

• أول حاجة هتعمليها، هتقفلي محبس الغاز، في حالة الغاز الطبيعي، وإذا كانت أنبوبة اقفلي محبس الغاز بتاعها فورا.
• ده بعد ما تتأكدي أنك قفلتي كل مفاتيح البوتاجاز.
• تحاولي تعرفي المصدر وتتأكدي من أي جهاز موصل بالغاز زي السخان أو الفرن الغاز أو البوتاجاز.
• تفتحي الشبابيك والأبواب عشان تتخلصي من الرائحة بسرعة.
• في حالة الغاز الطبيعي، هتقفلي المحبس وتتصلي بالشركة فورا، ومتتعامليش مع الغاز نهائي، ارقام طوارئ الغاز في مصر هي 129 رقم الطوارئ الخاص بتسرب الغاز في البيت.
• في حالة الأنبوبة، لو لقفلتي المحبس ولسه رائحة الغاز موجودة، والأنبوبة نفسها بتسرب، هتضعي عليها فوطة بصابون، وتخرجيها بره المنزل، لغاية ما تبدليها.
• لو كانت الإضاءة مفتوحة، متقفليهاش، ومتفتحيش أي مصدر جديد للكهرباء.
• ممنوع تشغيل أي جهاز كهربائي، وتبعدي أي مصدر ممكن يكون قابل للاشتعال زي الزيوت والكبريت والولاعات.
• لو عملتي كل الخطوات السابقة وما زالت رائحة الغاز موجودة، ومش قادرة تحددي مصدر التسريب، انتظري الشركة، واخرجي من الشقة، والأطفال في الأول لأن رئتهم ضعيفة.