أشهر 5 خرافات عن الحمل

على مر العصور سمعنا خرافات كتير عن فترة الحمل بسبب التغيرات اللي بتحصل للأم، فبتلجأ السيدات للخرافات في تفسير التغيرات دي، وفجأة تحولت الخرافات لمعتقدات موروثة عجز العلم عن تغييرها.

ومن أشهر الخرافات اللي سمعناها عن الفترة دي..

• "حرقان المعدة سببه شعر البيبي"

من أشهر المقولات المتداولة بسبب انتشار حالة "حرقان المعدة" عند الحوامل، لكن الحقيقة إن الجنين بيكون موجود داخل كيس الحمل اللي بيكون موجود داخل الرحم! يعني مالوش علاقة بالمعدة. أما السبب الحقيقي في الحرقان هو حموضة المعدة اللي بتزيد عند الحامل خصوصًا في أول 3 شهور من الحمل، وعشان تتجنبيها، بلاش الأكلات التقيلة، وما تمليش معدتك بالأكل لأن حركة الأمعاء في الوقت ده بتكون ضعيفة فطبيعي هتسببلك إحساس بالتخمة من أقل وجبة.

• "أنتي دلوقتي بتأكلي لاتنين"

فطبعًا هتضاعفي كمية وجبتك، وفي النهاية تسألي نفسك ليه وزني زاد في الحمل؟!.. والحقيقة إن وجبتك مينفعش تزيد عن معدلها الطبيعي عشان تتجنبي أمراض زي ارتفاع الضغط، وسكر الحمل.

• "مناخيرك كبرت تبقي حامل في ولد"

جملة مالهاش أي أساس علمي، لأن في كل الحالات شكل الجسم أثناء الحمل بيتغير بسبب هرمونات الحمل، فسواء حامل في بنت أو في ولد هتحصل تغيرات.

• "اولدي قيصري عشان جسمك ما يبوظش"

قرار طريقة الولادة لازم ترجعي فيه للدكتور أولًا، لأنه يعرف حالتك كويس، أما بخصوص موضوع شكل الجسم، فمالوش علاقة بطريقة الولادة لأن سواء ولدتي قيصري أو طبيعي الرياضة بس هي اللي هترجع جسمك لطبيعته.

• "ولادة السابع أحسن من ولادة التامن"

منطقي كل ما قربنا من التاسع كل ما صحة البيبي كانت أفضل، وبالتالي ولادة الثامن أكيد أفضل من السابع، فمش معنى إن في حالات نزل فيها البيبي في السابع كويس يبقى ده الطبيعي.