” السبرتو والجورنال السخن ” ... أشهر أدوية الشعب المصري

محمد هنيدي قالها ومكدبش "المصري معروف بقوته وجبروته"، والجبروت ده وصلهم أنهم يخترعوا أدوية للأمراض وهما قاعدين.
وبما أننا شعب "فتاي" ومينفعش نسيب حاجة من غير التاتش بتاعنا، كان لازم المصريين يحطوا لمستهم النهائية على الأدوية.

1- علاج الصداع
"تعالى أخدلك الشمس".. يعتبر العلاج ده أشهر أدوية المصريين على مر السنين، وهو عبارة عن ربط إيشارب حول الرأس وتقعدي تلفيه بمفك 4 مرات على الأربع جوانب بتاعت رأسك ومع اللف بتضغط على الرأس جدا، وده إن دل على شيء دل على أننا شعب فتاي.

2- الجورنال والعيش السخن
ده من أشهر علاجات الكحة، كل أما كنا بنكح، أمهاتنا كانت بتدفي عيش وتضعه في جورنال وبيضعوا الجورنال على صدرنا، وقال كده يعني الكحة هتروح.

3-  السبرتو الأبيض
من علاجات السخونية عند المصريين، أفتكر موقف لجدي وأنا صغيرة تعب جدا والسخونية زادت، ترك كل أدوية الدكاترة وغرق رأسه ب 3 زجاجات سبرتو، لاعتقاده أن كده السخونية هتخف، بس للأسف السخونية زادت.

4-  الجزر بيقوي النظر
كانوا بيقولونا وإحنا صغيرين لو عاوزين نظركم يقوى، لازم تأكلوا جزر، على اعتبار أنه بيقوي النظر.
وكبرنا وعرفنا أن دي كانت مجرد إشاعة من الحرب العالمية الثانية، لأن البريطانيون صنعوا رادر يعرفوا يرصدوا من خلاله أماكن الطائرات، وعشان يخفوا  المعلومة عن العدو قالوا إن الطيارين بتوعهم بيأكلوا جزر، وده أدي إلى أن نظرهم قوي جدا، وبيقدروا يشوفوا الطائرات بالعين المجردة.


5- علاج اللوز
زمان كانوا بيقولوا أن كل أما لوزك بتتعبك لازم تبلع بيضة مسلوقة كبيرة عشان تخف.