المجتمع يدبح سابع جار بـ”السنجل ماذر” و”الاستقلال”   

لحد دلوقتي اتعرض من مسلسل "سابع جار" على قناة "سي بي سي" 28 حلقة، المسلسل ليه جمهور كبير، والميزة الرئيسية فيه أنه بيجبر الكبير والصغير أنه يشوفه، فنلاقي العايلة كلها منتظرة قدام التلفزيون، اللي بيفوته التلفزيون بيشوفه على اليوتيوب، وصلت عدد مشاهدات الحلقة الواحدة لمليون ونص مشاهدة.

ردود الأفعال على المسلسل كانت ماشية بشكل جيد جدا، لحد ما جه كذا حقيقة صادمة موجودة في المجتمع بتاعنا اللي بيستنكرها المجتمع برده، الحاجات ديه اتواجهت بموجة انتقادات شديدة جدا على موقع الفيسبوك.

الانتقادات ركزت على 3 نماذج في المسلسل هم:

مي وأحمد علاقة خارج الزواج

نموذج مي الفتاة اللي بتنتمي للطبقة الغنية، اللي أتخرجت من الجامعة واستقلت عن أهلها، وعاشت لوحدها واشتغلت مع صاحبها، الانتقادات اللي اتوجهت لمي عشان علاقتها بواحد متجوز ودا كان واضح جدا للمشاهد وهو بيروح لها البيت من ورا سكان العمارة ومن التعليقات اللي أتقالت على علاقة مي بأحمد " العلاقات المحرمه بقت دلوقتي علاقات جميلة".

ومن الحاجات التانية اللي الناس هاجموا مي جدا بسببها أنها عايشة لوحدها، وصاحبها "هشام" اللي مشاركها في المكتب، بيدخل عليها أوضة النوم وهي نايمة.

هالة وعلى والسينجل مازر

هالة بنت جميلة والرجالة كلهم نفسهم يكلموها وهي رافضة الجواز نهائيا، لحد أما شافت على المهندس زميلها، عرضت عليه الجواز  على سنة الله ورسوله، عشان حاجة واحدة بس أنها تخلف طفل من صلبها.

لم علي رفض فكرة أنه يتجوزها عشان خايف من المسئولية، وطلب منها بشكل واضح أنهم يتصاحبوا وهي رفضت، فراحت لدكتورة النساء عشان تسألها على "تجميد البويضة" وفرصتها في الإنجاب لحد كام سنة.

طارق يهرب من زوجته النكدية بصداقة هبة

هبة بنت متخرجة من الجامعة، مبتشتغلش بتاخد كورسات ومبتكملهاش، لسه مش عارفة هدفها أيه في الدنيا، بتشرب سجاير من ورا والدتها، وهي بتشرب السجاير في البلكونة اتعرفت على طارق جارهم المتجوز وبعد شوية طلبت منه أنه يجبلها حشيش، والعلاقة بينهم بدأت تتطور وأخر مقابلة بينهم طلب منها أنه يمسك أيديها. هبة رفضت ونزلت من العربية، وحاولت تفهم طارق  أنهم أصحاب مش أكتر.