بيعرف منين ”أنها” عندك؟

 أكتر شئ بتحرص كل البنات والستات أنها تداريه وتخبيه، وبتاخد كل الاحتياطات أنه ميتكشفش ومحدش يعرف عنه حاجة، وبتتعامل معاه كأنه "سر حربي"، لكن للأسف السر ده بيتعرف وبيبان مهما داريتي "هرموناتك بتفضحك يا أستاذة"

الدورة الشهرية أو "البريود" أو "البتاعة" أيا كان المسمى، بنكون دايما متخيلين كبنات أنه حاجة نقدر نخبيها عن الرجالة وميبنش علينا خالص، لكن "احكي" عرفت من الرجالة إزاي بيكتشفوا "أنها" عندك، وإذا كنتِ متخيلة أنهم مش بياخدوا بالهم ومش بيركزوا في التفاصيل، "لا يا ماما" دول مصحصحينلنا قووي.

الراجل بيعرف إذا كانت مديرته أو زميلته في الشغل أو أخته أو خطيبته عندها "البريود" من شوية تصرفات:

• "أعصابي تعبانة شوية" كلمة السر اللي بيفسر من خلالها أنك بتمري بـ "البريود"، واللي أنتي فاكرة أنها بتداري ضيقتك وعصبيتك.
• الأكل بشراهة، وخاصة السكريات والشيكولاتة "ممكن تأكلك أنت شخصيا".
• بتبقى عاوزة تتخانق لأي سبب، ومتوترة دايما.
• لما تلاقيها في الصيف تلبس هدوم تقيلة.
• بتكون مش طايقاك ولا طايقة نفسها.
• بيبقى شكلها شاحب شوية، وعادة مش بتحط ميك أب.
• أول ما تحطي مانيكير وتبطلي تصلي في المكتب.
• "أنا منزل الأبليكشن بتاعها عندي، عشان اتابع البريود بتاعة مديرتي، وبقيت عارف مواعيدها".
• اللبس الواسع والغوامق "وانسى بقى الألوان الفاتحة يومين تلاتة كده".
• لو سألتها مالك ومتحكيش، وتقول "تعبانة شوية"، علطول بفهم لأن الستات مش طبعهم ميحكوش.
• لما حركتها في المكان تكون قليلة، ومش عاوزة تغير المكان.