البيوت المصرية بتقضي الكريسماس ”أكلة حلوة.. وفيلم كوميدي”

رغم أنه مناسبة ملهاش علاقة بثقافتنا بشكل كبير، البيوت والأسر المصرية بتحب الاحتفال بليلة رأس السنة، بعيد عن الخروجات الفردية لكل واحد في العيلة، التجمع مع بعض لاستقبال السنة الجديدة بتكون ليه متعة مختلفة، وروح تانية.

لو محتارين تعلموا إيه في السنة الجديدة مع بعض، في أسر ليها طرق احتفال بسيطة، لكن بتفرحهم، ممكن تعرفوا منهم أفكار تحتفلوا بيها مع اللي بتحبوهم.

• قبل رأس السنة بأسبوع، اتجمعوا واكتبوا أساميكم في ورق منفصل، وكل واحد هيطلع له شخص (مش هيقول عليه) يفكر في هدية ليه، وليلة رأس السنة تتوزع الهدايا.
• الكيكة من إيد الأم، والشاي باللبن مع فيلم Home Alone، قعدة بسيطة لكن مفرحة، مليانة ضحك وهزار.
• ندور على فيلم جديد وعائلي، ونعزم الأقارب، و"تبقى عشوة حلوة وفرجة تجمعنا".
• في أمهات ليهم طقوس مختلفة، بتخلي كل أفراد عائلتها يشربوا رشفة لبن مع أول دقات السنة الجديدة "عشان تكون سنة بيضا وصافية".
• في عائلات مع كل سنة جديدة تطلب أكل من بره (دليفري).
• في ناس بتحب تخرج تجرب مطعم جديد، أو تتفرج على فيلم في السينما، وممكن تقضي وقت ممتع في حديقة أو مول.
• أوقات الأب يجمع العيلة، ويقولهم أمنياته ليهم مع قدوم السنة الجديدة، ويفتكروا مع بعض أهم الحاجات اللي عدت عليهم.

كل بيت بيحاول يسعد أهله مع السنة الجديدة، ويعدي أزمات السنة اللي فاتت، أنتم كمان حاولوا تدوروا على أي حاجة تجمعكم ببعض وتسعدكم.