إزاي تخلصي من الراجل ”اللزقة”؟

بتحصل كتير إنه يكون لينا أصدقاء ومعارف، بعضهم بيتخيل إنه العلاقة اللي بيننا من الممكن أنها تتطور لمرحلة تانية، في حين إننا بنكون شايفين علاقتنا بيهم، علاقة عادية، أو حتى مش شايفينها بالأساس.

يعني هتلاقي واحد بيفسر صداقتكم بطريقة مختلفة، وبدأ يعبر لك عن إعجابه وحبه، والموضوع بقى بياخد شكل تاني بالنسبة له، ودلوقتي أنتي في مأزق، هو بيحبك وأنتي مش بتبادليه أي مشاعر، ولا إعجاب حتى، الوضع بقى محرج، وأنتي عندك إحساس بالذنب، ومش عارفه تتخلصي منه وتكرهيه فيكي إزاي؟

الوضع كمان بيكون سخيف لما بتكون تصرفاته بتخنقك، يعني مكالمات ورسايل طول الوقت، والمكان اللي أنتي فيه لازم يروحه، ومش مديكي أي مساحة أو فرصة، قال يعني كده بيقربك منه وبيحببك فيه، وهو كل حركاته بالنسبة لك بتقول إنه "لزقة"، وبتخليكي تفكري في حاجة واحدة "هخلص منه إزاي؟".

الطرق كتيرة، وإحنا هنقولك إزاي هتخليه يفهمها لوحده:

• هتقللي من التواصل معاه تدريجيا، ولو استفسر عن السبب "أصل معنديش وقت لأي حاجة تشغلني الفترة دي، وعاوزة أركز في شغلي (أو دراستي) بس".
• الرد ممكن يكون واضح، ولكن بطريقة لبقة "انا شايفة أنه علاقتنا كزملاء أو أصدقاء أفضل بكتير".
• ممكن تبدأي تصرفي انتباهه عنك "تعرف (فلانة)، عندها نفس اهتماماتك" وتعرفيهم على بعض (إذا كانت هي موافقة وعندها استعداد).
• عشان تتخلصي من إمكانية أنكم تتقابلوا أو يحصل ما بينكم حوار، تجنبي الأماكن اللي أنتي عارفة أنه بيروحها أو ممكن يتواجد فيها.
• في طريقة ممكن تتبيعها، هو أنك تبدأي تكرهيه فيكي، وفي وجوده تتصرفي بطريقة سخيفة، وتعملي حاجات غير متوقعة، زي أنك تتكلمي بأسلوب وصوت عالي، على غير عادتك، الطريقة دي ممكن تكون غريبة أو تضطرك تعملي حاجات مش بتحبيها، لكن ممكن تلجأي لها لما يكون فاض بيكي.
• تتفقي مع حد من أصدقائك أنه قدامه "تمثلوا" أنكم في علاقة أو بتحبوا بعض، عشان يبدأ يحس أنه في حد تاني في حياتك ويبعد.
• تمنعي أي فرصة للتواصل ما بينكم، بلوك على كل وسائل التواصل (فيسبوك، إنستجرام، تويتر)، عشان ميكونش في فرصة للكلام او التعليق أو أنه يعرف حتى أنتي بتعملي إيه وفين.
• أو ممكن تقوليها بصراحة "أنا مش شايفة أنه ينفع يكون في أي حاجة بيننا، ومش حاسة أننا مناسبين لبعض".
• وفي حيلة، أنك تخترعي مشكلة معاه، وتقرري تقطعي علاقتك بيها بسببها.

حاولي وأنتي بتتخلصي من الحبيب ده، متعرضيش نفسك لمواقف أو تعملي تصرفات متحبيش نفسك بسببها، أو أنك تجرحي مشاعره بشكل فج.