”السناجل” كمان بيهادوا أحبابهم في عيد الحب

عيد الحب، اللي ناس كتير بتعتبره مخصوص للـ couples وبس، السناجل كمان من حقهم يحتفلوا بيه، مش عشان الحب إحساس مش مقتصر على الحبيبة وبس، لكن كمان لأنه في حياة كل واحد مننا شخص يستحق أننا نعبر له عن حبنا ونقدره صح.

وعشان يوم عيد الحب يعدي من غير ما تحسي بالحسرة لأنك وحيدة، اعرفي من "السناجل"  اللي زيك ممكن يقدموا هدية لمين في عيد الحب، يمكن أنتي كمان تلاقي حواليكي اللي يستحق منك تقولي له "شكرا".. أنا بحبك".

لما "احكي" سألهم عن الشخص اللي ممكن يهادوه في الفلانتينن كانت إجاباتهم:

• هديها لأكتر صديق بيسمعني ويتحملني مهما اشتكيت، ووفيّ وحنين في جميع الأوقات، حتى أمهاتي أنا وأصحابي بيكلموه ويشتكوا له وهو بيسمع لهم... "هديته ممكن تبقى عزومة على أكلة بيحبها أو دبدوب كبير".
• صاحبتي اللي بتتحملني وبحرق دمها كتير هجيبلها كرة ضغط عشان تعبت من خلاص.
• غير أنه ماما عيد ميلادها في نفس اليوم، لكن هي أكتر حد لما بحكي له اللي بيضايقني برتاح، بنتخانق كتير بس هي الوحيدة اللي اللي بحس معاها بإحساس الراحة.
• أنا وبابا عاملين زي الأصحاب، بنخرج مع بعض، وبركب وراه على الموتوسيكل ولما يعطل ننزل نصلحه سوا، وبأقعد معاه على القهوة، وعلاقتنا تخليني احكي له اللي مضايقني واشتكي له، فممكن في عيد الحب أعزمه أنا على الغدا بدل ما هو كل مرة بيعزمني.
• ممكن أنا وصاحبتي نهادي بعض، على الأقل نواسي بعض.
• بحس أنه أخويا طيب جدا، ومحتاج يستوعب أنه في ناس بتقدره وبتحبه، عشان كده هو اللي يستحق أنه أجيب له أي حاجة بيحبها أو نخرج مع بعض خروجة حلوة.
• من غير ما أفكر هتكون صاحبتي، اللي بتخليني أحب نفسي.
• هديها للسند والضهر اللي بتديني من غير مقابل، وحنينة عليا وعلى أولادي، أختي اللي بتحب من القلب.

دوروا على اللي بتحبوهم حواليكم، واعتبروا عيد الحب مناسبة عشان تعبروا عن إحساسكم تجاههم.