9 أماكن للتطوع في وقت فراغك

من الحاجات اللي بتفرق مع أي شخص، واللي ممكن فعلا تديله الإحساس بأهميته، وانه يكون مهم للمجتمع اللي عايش فيه وللناس اللي حواليه، أن يقدم لهم خدمة ومساعدة دون مقابل، ومن غير ما يكون بيمّن عليهمن او عنده إحساس بالضيق من العطاء.

التطوع بيفيد المجتمع أكيد، وبيقدر ينمي جواك قدرات ومهارات كانت غايبة عنك، كمان فكرة عدم وجود مردود مادي ملموس للي بتعمله (بمعنى فلوس يعني)، بيخليك تحس بالسعادة وتستوعب انه اوقات كتير المردود المعنوي والتقدير أهم بكتير.

فإذا كنت طالب/ة، أو بتشتغل لكن عندك وقت وتقدر تفيد وتعلم وتتعلم، دي مجموعة من الأماكن والمؤسسات اللي ممكن تتطوع فيها:

جمعية رسالة الخيرية

من أشهر الجمعيات في مجال العمل الخيري، وبتقوم على المتطوعين في كتير من أنشطتها، وليها فروع في أغلب مناطق ومحافظات مصر، ويقدر المتطوع يشارك عن طريق الفرع نفسه، ومن هنا تقدروا تعرفوا عناوين كل فروعها.

صناع الحياة

مؤسسة تنموية تطوعية، بتقدم مشروعات لمحو الأمية ودعم المشروعات الصغيرة، وتقديم المساعدات الإنسانية، وهدفها مساعدة الفقراء والتخلص من الجهل والمرض، وصل عدد المتطوعين فيها لأكثر من 15 ألف شخصن وعشان تقدروا تتطوعوا فيها زوروا الموقع من هنا.

الهلال الأحمر المصري

جمعية ليها تاريخ طويل بيعود للثلاثينات، وهدفها في المقام الأول تقديم المساعدة الإنسانية من غير الاهتمام بالاختلافات العرقية أو النوع أو غيرها، وبتقد المساعدة دي في مجال الإغاثة ومواجهة الكوارث ومجالات الصحة العامة، التطوع فيها بيتم بعد التدريب على الإسعافات الأولية وطرق الإغاثة، والتعرف على القانون الدولي الإنساني، عشان تتطوعوا وتعرفوا أكتر من هنا.

بهية

مستشفى ناتجة عن مؤسسة بهية هدفها علاج السيدات من مرض سرطان الثدي بدون مقابل، وأكيد بتحتاج كتطوعين في مجالات الموارد البشرية، والدعم النفسي للمريضات، وتوصيلهم للمستشفى أو استقبالهم وتوعيتهم بالمرض، ويمكن التطوع من خلال الاستمارة من هنا.

الأمم المتحدة

التطوع في منظمة كبيرة زي الأمم المتحدة بتخدم العالم كله، بيفرق على المستوى الشخصي كتير، وبيعلم وبيفتح التفكير على ثقافات مختلفة، وبتركز على مكجالات المساعدة الإنمائية وعمليات حفظ السلام والمساعدات الإنسانية، وممكن تعرفوا وتقدموا للتطوع من هنا.

إنجاز مصر

مؤسسة هدفها مساعدة الطلاب والشباب على المساهمة في التنمية الاقتصادية لبلدهم، وتنمية قدراتهم في مجالات ريادة الأعمال، وتمكين مليون شاب مصري بحلول عام 2020، عبر خضوعهم لتدريبات وتعزيز مهاراتهم وقدراتهم، وممكن تعرفوا أكتر عن المؤسسة والتطوع فيها من هنا.

من أحياها

جمعية تأسست في 2007، وهدفها تحسين الأفراد على مستوى التعليم والاقتصاد، وبتشتغل على الأطفال وأصحاب المشروعات من خلال أكتر من مشروعن منهم (التعليم البديل، برنامج المليون حلم، ومشروع ارسم حلمك، وبرنامج تكافل)، والأكيد أنها بتحتاج لمتطوعين، من الممكن أنهم يشاركوا في تنفيذ المشروعات كل شخص حسب خبرته، وعشان كده تقدروا تتواصلوا معاهم من خلال صفحتهم على فيسبوك من هنا.

مرسال

مؤسسة مرسال بتختص بتقديم خدمات طبية للمرضى اللي معندهمش القدرة المالية، وبتشتغل على أنه توفر لهم نظام تأمين صحي شامل، غير المركز التابع ليها، وبيقدم تشخيص وعلاج لمرضى الأورامن وعشان تتطوعوا فيها اعرفوا أكتر من الموقع من هنا.

المؤسسات المحلية في منطقتك

في كل منطقة أو حي بيكون في مؤسسة لتنمية المجتمع، من الممكن تحاول تقدم وتتطوع فيها إذا كانت بتقدم أنشطة مجتمعية مفيدة.