5 أنواع من الباد بويز اللي ممكن تقابليهم في حياتك
الأكثر مشاهدة
سؤال إحنا ليه دايما بنقع في حب الباد بويز وبننجذب لهم بقى أصعب من أسئلة الثانوية العامة، رغم إن برضو في تحليلات وإجابات كتير هتلاقيها في الموضوع ده وإحنا نفسنا حاولنا نجاوب عليه هنا. بس الأهم من ليه، هو ايه هم أنواع الباد بويز اللي ممكن تقابليهم في حياتك واللي كتير منه برضو ممكن تنجذبيله وتنبهري بيه. والنهاردة قررت أشاركك تفكيري وتحليلي للموضوع من واقع السينما المصرية اللي ساهمت كتير في تجميل صورة الباد بوي بصراحة برضو...
1- حازم في السلم والتعبان
"الباد بوي اللي مابيطولش في أي علاقة عاطفية"
طبعا لازم يبقى أول واحد نذكره هو شخصية حازم في فيلم السلم والتعبان، الفيلم اللي عرض واحدة من قصص الحب اللي بيعشها كتير من جيل الفيلم ده. وخلى نموذج حازم من أشهر نماذج الباد بويز. والنوع الأول في الباد بويز هو بالظبط زي بطل الفيلم حازم. الشاب الجان الحليوة اللي بيحب البنات، اللي ممكن يجذبك في الأول، لكنه في الأساس مابيقدرش يتحمل مسئولية علاقة عاطفية، وعايز يعيش حر من غير جواز. وممكن ينهي العلاقة في أي وقت لمجرد أنه "زهق". وطبعا مش أكيد ان في الحقيقة يطلع زي حازم في الفيلم برضو ويعملك إعلان في الشارع عشان ترجعيله! ناخد بالنا.
2- خالد في سهر الليالي
"الباد بوي الخاين"
الشخصية الأشهر في عالم الباد بويز. الراجل الخاين، اللي بيقضيها مع كل البنات، بس عارف أنه هيرجع يلاقيكي مستنياه. ده بيعمل ما بداله، وكل مرة يا بينكر، يا بيعتذر ويهديكي بكلمتين. احذري تماما من هذا النوع لأن حبك ليه ممكن يعميكي عن حاجات كتير ويخليكي تقبلي بحاجات صعبة ومع الوقت ممكن تخسري احترامك لنفسك وليه طبعا. الخيانة وعدم الاحترام كفيل يدمر أي علاقة.
اقرئي أيضا: أسباب تجعل البنات تخاف من فكرة الارتباط
3- رشيد في أسوار القمر
"الباد بوي التوكسيك"
عمدة الباد بويز، شبه شخصية رشيد في فيلم أسوار القمر، الشخص المطرقع اللي عايش حياته بالطول والعرض والبنات حواليه دايما، وممكن تطيري من الفرحة لما يُعجب بيكي. بس بتكتشفي بعد كده أن الحياة الوردية دي مش كده فعلا، وأن السيطرة وحب التحكم ممكن يكرهك في حياتك. شخصية رشيد موجودة كتير في حياتنا، الشخص المبهر من برة واللي ممكن تسيبي حب حقيقي لمجرد انبهارك بيه. بس لما بتقربي أول بتعرفي الحقيقة وبيتحول ليكون شخص توكسيك يخلي حياتك أسوأ.
4- سامح في سهر الليالي
"الباد بوي اللي بيخاف من الارتباط"
الـ Fear of Commitment اللي هيودينا في داهية! وكانت شخصية سامح في سهر الليالي مثال قوي جدا عن النوع ده من الباد بويز. الشخص اللي بتقابليه ويبقى في بينكوا تفاهم وحب وكل حاجة حلوة، بس للأسف بيكون عنده نوع من الخوف من الارتباط واللي بيجر وراه بقى خوف من تحمل المسئولية وهوس وخوف جديد من فشل العلاقة. الموضوع حقيقي مُرهق نفسيا لما ترتبطي بشخص بيقرب بس خايف من القرب ده، وخايف تجمعكوا علاقة طويلة الأمد! في يا إما تحليله مشكلته يا إما تبعدي خالص.
اقرئي أيضا: أنواع الرجال في العلاقات العاطفية وكيف تتعامل معهم
5- عمر في عن العشق والهوا
"الباد بوي الأناني"
"لو كرهوك ماكنوش اتوجعوا يا عُمر" عالية لخصت شخصية عُمر في الجملة دي. عُمر في العشق والهوا من أشهر الباد بويز اللي ممكن يمروا في حياتك. والمشكلة انك ممكن جدا تحبيه وعشان كده هتتوجعي. مشكلة هذا النوع من الباد بويز هى الأنانية، عايز كل حاجة من غير ما يخسر حاجة، مش عايز يتوجع هو حتى لو حساب غيره، مابيتنزلش وبيحاول يمسك العصايا من النص عشان مافيش حاجة تفوته. النوع ده خطير جدا وممكن ماتكتشفيش عيوبه إلا متأخر.
اقرئي أيضا: من وحي مسلسل زي الشمس ليه شخصية عمر تكسب شخصية مصطفى
الكاتب
دينا خليل
الإثنين ٢٣ ديسمبر ٢٠١٩
التعليقات
لا يوجد تعليقات
اترك تعليقا