عشان سعاد جوا كل بنت على رأي محمد خان فا لازم نحكي عنها طالما بنحكي للبنات..

سعاد عظمتها في إنها كانت بنت أوي زينا كلنا عايزه تلبس فساتين وتحب وتدلع وفي نفس الوقت طموحه جدا زي كل البنات ..

جمهورها وفنها حياتها، سعاد عملت 80 فيلم في 30 سنة غير الأغاني والاستعرضات والرقص كانت بتحب الدنيا والضحك والحب حبت كتير واتجوزت 5 مرات وفي الـ5 مرات حبت بجد سابت واتسابت بس فضلت محافظة على دلعها وضحكها وخفت روحها، مفيش حاجه قدرت تكسرها هو في حاجه بتكسر البنات يعني؟

،وبعد ما كبرت وتعبت وتخنت، وكان عندها تعب في ضهرها وسنانها وشبه شلل في نص وشها ورغم صعوبة ده عليها وانها مبقتش البنوتة الدلوعة برضه كانت لسة بتضحك وتنكت وتهزر ومصرة تخس وتتعالج عشان ترجع لشغفها وجمهورها.

في الفترة دي مرضيتش تخلي حد يشوفها طول الأربع سنين اللي بتتعالج فيهم حتى جوزها كان صعب على سعاد الحلوة تبان وحشة في عين حد.وكل ده مقدرش يكسر سعاد اللي كسرها وبّكاها هو مقال كان بيناشد المسؤلين ينقذوا سعاد من مصيرها المجهول وأن .في ناس شافوها في لندن بتاكل بطريقه همجيه وإن وزنها بقى فوق الـ100 كيلو وإنها اخدت .فلوس من أمير سعودي

اللي كتب الكلام كان قصده يساعدها بس الكلام كسرها وكأبها جدا اكتر من أي وجع جسدي أو مرض. ومن الحاجات التانيه اللي ضايقتها كان إن كل شويه حد من الفنانات المعتزلات يكلمها تتحجب وهيساعدوها ماليا ويخلوها تحج، لكن سعاد عمرها ما حست إن الفن حرام أو في شرط المفروض تعمله عشان تحج أو تخف.. فكرة ربط المرض بالتوبة عن حاجة انت مش شايفها ذنب دي مش حلوة وسعاد مقدرتش تستوعبها أو تتقبلها حتى .

أنا معرفش سعاد انتحرت ولا اتقتلت بس اللي اعرفه إن المقال والكلام ده أكيد قتل حاجات كتير جواها وكسرها أكتر من أي تعب، الكلام بالنسبة لسعاد كان أصعب وجع. اتمنى إن الوجع ده يكون خف شويه قبل ما تمشي ومعتقدش إنها مشيت بمزاجها أو متمناش إنها تكون اتطفت الطاقة والحب والحياة والحب .. أصل سعاد مينفعش  تطفي مينفعش أبدا، وأنا ...واثقة إن سعاد حاليا فراشة حلوة بتغني وترقص في مكان ما