نورا بركة تكتب: الست انشراح

"بيتي مش هيتخرب يا ونوس "

الجملة دي قالتها إنشراح اللي بتأديها هالة صدقي في مسلسل #ونوس ، وقالتها بإصرار وإقرار لموقفها من ونوس ومحاولاته الدءوبة المستمرة لإغرائهم بالفلوس والأمان والشهرة .

ونوس وهو اقتباس من حكاية " فاوست " للألماني جوته . ونوس في عقد قديم بينه وبين ياقوت وياقوت أخل بيه ، ياقوت يبقى جوز انشراح اللي سابها من أكتر من عشرين سنة واختفى

ونوس بقى عشان يضغط على ياقوت ، خد عيلته وولاده مدخل ليه بيغويهم ويورطهم في مخاطر عشان يضغط على أبوهم .

إنشراح بتشوف عيالها بيتورطوا في مشكلة ورا التانية وونوس مش سايبهم ، مبتلحقش تشم نفسها فعلا . بتجري من هنا لهناك ما بين حل مشاكل والتفكير في اللي مش قادرة له ، خوف على ولادها اللي بيغني في كباريه واللي بتؤمن بأعمال واللي بيجري ورا فلوس عشان يعيش ولابنت اختها اليتيمة اللي ربتها عندها

ولما تتعب ، تقعد تعيط في بيتها  وتصرخ !

" شيل معايا يافاروق .. مش عايزة أخواتك يفرتوا مني "

بتقولها لابنها الكبير اللي مكبراه طول الوقت ، عشان تحس إن لها راجل – طبيعة الأنثى – محتاجة السند والضل وبتعمله لو مش موجود

إنشراح ،كان بيحبها جارها الشاب المراهق . لما بعت لها رسايل حب على تليفونها ابتسمت وفكرها ب "شغل العيال " فضحكت بس لما شافته بهدلته .

لما صاحبتها جابت لها عريس ، زعقت لها وقالت لها أنا متجوزة !!

رغم انه سايبها من اكتر من 20 سنة ، رفضت العريس وقالت جوزي وهي ولاطايقاه ولامسمحاه بس برضه اسمه جوزها . المهم ال Frame  اللي هي عاملاه للبيت اللي هو أهم مليون مرة من " زوج " عندها .

حتى لما في توقيت ياقوت قالها " العيال كبرت وكل واحد شاف حاله " وردت هي وقالت له بأسى " أنا كمان كبرت ، بس مشفتش حالي ، وعايزة أشوف حالي بقى "

كانت في حالة إحباط ويأس ، كانت حالة مؤقتة فعلا . وكمان كانت لما عيالها سابوها واتفرقوا وحست بالعجز .

اللي كسرها ، عيالها سندها .. مش الراجل !

وهي نفسها اللي قفلت باب بيتها لما اتجمعوا عيالها تاني ووقفت ع الباب وقالت لهم محدش خارج ، ولما ياقوت لقوه ميت على باب البيت قالت ببساطه وسماحة " الله يرحمك يا ياقوت "

انشراح : 1 ، ونوس والمجتمع بتقله : 0

إنشراح بتعيط كتير ،مسرسعة وبتصرخ مرات ،  بس مشغولة بأولادها وأحفادها وشالت همهم وهم عوضها .

أيوا عوضها ..

وهو ده حضرتك فكر أغلب ستات مصر ، ونموذج إنشراح متكرر في أغلب بيوت مصر .

ومش لازم يكون جوزها سايبها ومختفي على فكرة ، لأ ممكن أوي يكون معاها وبيصرف عليهم بس هي اللي شايله الهم والحمل كله . غير فئة الستات المعيلات دول كمان .

ومع السنين بتنسى حاجات كتير وبتتعلم تبقى " انشراح " يعني " راجل وست البيت "

"انشراح " نسخ متكرة حواليكم كتير . ولأن الحكاية هادية ولافي دم ولاقتل ولامصايب مبننتبهش أصلا تقريبا شفتم بقى أغلب البيوت المصرية مكملة ازاي ؟!

شفتم الست المصرية والزوجة المصرية ؟!

واخدين بالكم إن " انشراح " دي ست ناقصة عقل ودين ؟!

طيب فاكرين المثل الشعبي المصري اللي بيقول " الراجل ابن الراجل ، اللي عمره مايشاور مراته " ؟!

طيب واللي شايفين إن الست للغواية والمتعة ؟!

طيب .