8 أسرار توصلي بيهم للشكل المثالي للمانيكير

المانيكير بيكلكع على ضوافرك.. بيتقشر بسرعة.. مش بيطلع بالشكل اللي كنتي متخيلاه؟ كل دي مشاكل ممكن تتجنبيها لو اتبعتي خطوات بسيطة قبل وأثناء تطبيق المانيكير على ضوافرك.

1- لازم تغسلي إيدك وتنضفي ضوافرك كويس بالمياة والصابون، عشان تزيلي كل الزيوت والأتربة اللي على ضوافرك واللي بتتسبب في ظهور فقاعات على الضافر بعد ما ينشف.

2-  قبل ما تحطي المانيكير لازم تنضفيها بالأسيتون أو بالليمون علشان تتأكدي من تنضيفها تمامًا وتعيدي حيويتها.

3-  حطي طبقة Base Coat عشان تحمي بيها ضوافرك من البقع اللي بيسيبها المانيكير، ده غير إنها بتساعد في تقوية الضوافر وبتسهلك عملية تطبيق المانيكير بسلاسة.

4-  لو هتحطي مانيكير جليتر لازم تستخدمي Base Coat مخصوص ليه، لإن المانيكير الجليتر من أصعب أنواع المانيكير في إزالته، وعشان ما يسيبش أثر على ضوافرك وما يئذيهاش استخدمي Base Coat مخصوص ليه واللي هيساعدك في إزالة قشرة المانيكير وقت ما تحبي تشيليه بمنتهى السهولة.

5-  حطي المانيكير في تلات اتجاهات، ابدأي بمنتصف الضافر، بعدين طبقتين من الجنبين، عشان يديكي شكل حلو بطبقة رقيقة من المانيكير.

6-  اتجنبي الطبقات الكتير من المانيكير، لإنها هتكلكع وتديكي شكل مش مرغوب فيه، عشان كدة اتأكدي من خروج كمية كافيةعلى فرشة المانيكير.

7- لو لقيتي أي زيادات خرجت عن الضافر، نضفيها بأعواد القطن الخاصة بتنضيف الودان، حطي عليها طبقة أسيتون ونضفي حواف الضوافر.

8-   اتأكدي إن المانيكير نشف على ضوافرك تمامًا وبعدين حطي فوقيه الـ Top Coat ، ولازم تاخدي بالك وانتي بتحطيه بالظبط زي المانيكير عشان ما يكلكعش وتبوظي شكل المانيكير.

أهم سر في جمال شكل ضوافرك لازم تسيبيلها مساحة للتنفس، ما تحطيش مانيكير طول الوقت، واهتمي بطلاء ضوافرك بطبقات بروتين، اللي هتلاقيها بسهولة في الصيدليات.