”اعمليها بنفسك”.. كرات الاستحمام الفوارة ”Bath Bomb”

"اعمليها بنفسك" هتكون سلسلة من الموضوعات علشان تعملي بدائل للمنتجات الغالية وسط ارتفاع الأسعار اللي بنعيشه.. النهارده هنعلمك إزاي تعملي كرات الاستحمام الفوارة اللي بقت مشهورة جدًا، هي بتساعد على استرخاء الجسم وبتقشر الجلد الميت وبتنعم البشرة، بتعمل فوران في البانيو وبتدي ريحة حلوة وألوان جميلة وكأنك في Spa، اعمليها واملي البانيو مايه دافية وحطيها.. دي الطريقة..
 من عند أقرب عطار اشتري المكونات دي:

-كوب بيكربونات الصوديوم "كاربوناتو"

-1/2 كوب حامض الستريك

-1/4 كوب ملح البحر أو ملح إنجليزي

-2 ملعقة صغيرة من زيت الزيتون

-ملعقة كبيرة لبن بودرة

-7 قطرات من الزيت العطري المفضل "نعناع، برتقال، ليمون، لافندر..."

-قطرات من اللون المفضل "ألوان طعام"

- كرة بلاستيكة مكونة من نصفين

الطريقة:
في طبق كبير ضيفي البيكربونات مع حامض الستريك مع ملح البحر أو الملح الإنجليزي واللبن البودرة واخلطيهم، وفي طبق صغير حطي زيت الزيتون مع نقط من اللون اللي هتختاريه وصبيه على مكونات الطبق الكبير وقلبي كويس، وضيفي نقط الزيت العطري وقلبي كتير لغاية ما تدخل في كل الخليط، هاتي الكورة البلاستيك وحطي جواها الخليط واقفليها كويس وسبيها في التلاجة لمدة يوم وهتبقى جاهزة للاستخدام.
ممكن تعملي من المقادير اللي فوق دي عدد من الكرات، بألوان مختلفة وروائح مختلفة وتسبيها لغاية وقت الاستخدام، افصلي شوية من خليط البيكربونات والملح والحامض في أطباق مختلفة ولونيهم براحتك.. وممكن تعملي منهم طبقات بألوان مختلفة.