5 استخدامات مختلفة للبرطمانات القديمة

معظم الأمهات المصرية مابتحبش ترمي أي حاجة قديمة طبعا، وعلى ذلك بتستغل البرطمانات القديمة في تخزين التوابل أو المخلل، تفتحي أنتي الثلاجة تلاقي علبة آيس كريم فتفرحي جدا تيجي تفتحيها تلاقي الوالدة مخزنة فيها مخلل ..

احكي جمعتلك شوية أفكار عصرية لاستخدام البرطمانات غير تخزين المخلل والتوابل

1- ممكن تستخدمي البرطمان كمقلمة لابنك بس اعملي شوية اضافات بالورد المجفف وشرايط الستان وورق الكانسون .

2- اعملي Wishes box من البرطمانات القديمة، وممكن تلونيه وتزينيه وتكتبي فيه الذكريات الحلوة بينك وبين صحبتك وتقديمها ليها هدية في عيد ميلادها.

3- بدل ما تحطي لمبة النور لوحدها، ممكن تدخليها في برطمان قديم وتعلقيها في السقف هتعمل ديكور حلو وكمان هتحافظ على اللمبات.

4- ممكن تعمليها حصالة لابنك، اخرمي البرطمان من فوق وزينيه من بره واستخدميها كحصالة.

5- ممكن تزينيها من برة بالدانتيل وتستخدميها كمزهريات للورد.