5 أنواع من صاحباتك البنات

في كل شلة بنات هتلاقي أصحاب مختلفة،  وعلى الرغم من اختلافهم هتلاقيهم بيحبوا بعض جدا ومرتبطين.

تعالي نشوف خمس أنواع للصحاب هتلاقيهم في كل مكان

1-السيلفي جيرل

البنت اللى هتلاقيها دايما بتاخد سيلفي في وسط المحاضرة، في الشارع، في الشغل، حياتها عبارة عن سيلفي وبس، موبايلها عبارة عن صور ليها، ودي دايما مش هتلاقيها معاكي، لو عاوزاها في حاجة مهمة ممكن تاخدي ميعاد معاها من على إنستجرام.

2- النكدية

اللي دايما بتفكر في الماضي، دايما تلاقيها بتحول الكلام لنكد وبتتكلم عن اكساتها(علاقاتها القديمة)  وبتكتئب وتكئبنا معاها.

3- الخريطة بتاعتكوا

البنت اللي تلاقيها حافظة مصر كلها، عارفة المكان الفلاني بيتراح إزاي وبتركبي له إيه، عارفة المطاعم الجديدة وأماكنها وإيه الحلو وإيه الوحش وبتقدم ايه ومبتقدمش ايه.

4- حافظة قفشات الأفلام

البنت اللي بتلاقيها دايما حافظة قفشات الأفلام، كل كلمة تقوليها تلاقيها تألش عليها من فيلم كذا، عارفة تحط الألشه دي فين والألشه دي فين، وعادة دول اللي بيكونوا عاملين للشلة جو حلو.

5-  الفاشونيستا

البنت الفاشونستا في نفسها اللي دايما صارفة فلوسها على اللبس الجديد والميك آب، البنت اللي حد قالها الطرحة بتاعتك بايظة ممكن تلغي الخروجة عشان طرف الطرحة بس، شكلها ولبسها  أهم حاجة عندها، لو عندها طفل مش هيبقي أهم من شكل الاسكارف ولا البوت.