تخلصي من ”الكرش” قبل مناسبتك المهمة بـ 5 أيام

ليلة الحنة، وزفة العربيات على الكورنيش، وأسماء الله الحسنى.. دي طقوس الأفراح عندنا، لكن قبل الفرح في طقوس تانية تمامًا، زي اللف على المحلات عشان نشتري أكتر فستان مناسب للاحتفال، وفي أغلب الأوقات بتواجهنا مشكلة "الكرش" اللي أوقات بيوصلنا نشتري حاجات مش راضيين عن شكلها، ونسيب اللي كان نفسنا فيه.

بس دلوقتي تقدري تشتري اللبس اللي نفسك فيه لو اتبعتي بعض الخطوات اللي هتساعدك على التخلص من الكرش بسهولة..

• قبل المناسبة بـ 5 أيام انتظمي على شرب المشروبات السخنة اللي بتساعد على تنظيم حركة الأمعاء، عشان تقلل من انتفاخ القولون، وتديكي شكل حلو لبطنك، زي مشروب الكمون المغلي، وابعدي عن الأكلات اللي بتنفخ القولون، زي البقوليات، والكرنب وغيرها.

• شدي عضلات بطنك بتمرين بسيط، شفط البطن طول وقت الجلوس، وخصوصًا وأنتي بتأكلي.

• لو جسمك بيحتفظ بالمياه استخدمي المشروبات اللي هتخلصك من المياه الزايدة في جسمك، زي الشاي الأخضر، اشربيه قبل وبعد كل وجبة، بس ابعدي عن شربه يوم المناسبة عشان تتجنبي دخول "التواليت" كتير.

• قبل المناسبة بكام يوم اعملي تمارين بسيطة في البيت هتخلصك من الغازات اللي بتسبب انتفاخ لبطنك، زي العجلة، والاسكوات، والمشي.

• اهتمي بأكل الفواكه اللي بتساعد على الهضم بعد كل وجبة بساعة، زي العنب، والموز، والتفاح.