تعرفي على ”الكولاجين”.. فوائده وأضراره للبشرة

سمعنا كتير مصطلحات طبية بتتداولها البنات بعد ما تعمقوا في عالم التجميل اللي تطور بشكل كبير جدًا، ومن أشهر المصطلحات اللي انتشرت مؤخرًا مصطلح "الكولاجين".

إيه هو الكولاجين؟

الكولاجين هو بروتين موجود في أجسامنا بنسبة كبيرة جدًا وفي أماكن مختلفة من الجسم، زي العظام والأنسجة والعضلات والأوعية الدموية، لكن أشهر مكان موجود فيه كولاجين هو كولاجين البشرة، طبعًا شهرته ترجع لدخوله مؤخرًا في مستحضرات تجميل وعلاج البشرة.

كولاجين البشرة هو المسؤول عن نضارة البشرة، والحفاظ على شبابها، وتأخير ظهور التجاعيد، عشان كده لجأ دكاترة التجميل لاستخدامه في علاج مشاكل البشرة اللي بتظهر مع تقدم السن، أو نتيجة إهمال البشرة.

إزاي بيستخدم الكولاجين في تجميل البشرة؟

الكولاجين دخل في منتجات تجميلية كتير بينصح بيها بعض دكاترة التجميل ومن أبرز المنتجات دي..

كريمات الجولاجين:

من أشهر المنتجات المنتشرة في الأسواق، بس لازم قبل ما تقدمي على فكرة استخدامه تتأكدي الأول من جودة المنتج أو تستخدميه تحت إشراف الدكتور.

وبتنقسم كريمات الكولاجين لنوعين النوع الأول لمقاومة تجاعيد البشرة وده بينصح باستخدامه للشابات تحت سن الثلاثين، علشان يتجنبوا ظهور التجاعيد، أما النوع التاني فهو النوع المعالج للتجاعيد وبيتم استخدامه بعد ظهورها للسيدات فوق 45 سنة.

مكونات كريم الكولاجين بتكون مستخرجة من الحيوانات، أو الأسماك بسبب توافر النوع ده من البروتين في أجسامهم.

كبسولات الكولاجين:

تعتبر مكملات غذائية وفيها بيتم تعبئة الكولاجين في شكل كبسولات، بيستفاد منها الجسم عمومًا مش بس البشرة، لكن تعتبر أسعارها مرتفعة جدًا.

بتبدأ البشرة تتجاوب معاها بعد تناول كميات كبيرة، وآثارها مش بس بتظهر على البشرة لكن بتمتد كمان للشعر والأظافر.

حقن الكولاجين:

وتعتبر أحدث وأسرع الطرق المستخدمة في العلاج بالكولاجين، مش بس بيستخدم في إعادة نضارة البشرة، وإزالة آثار الجروح وحب الشباب، كمان بيستخدم في نفخ الشفايف والخدود.

بتستخدم حقن الكولاجين عن طريق دكتور تجميل، لإن الحقن مش متوفرة في الصيدليات ومينفعش تستخدميها بنفسك في البيت، ولازم تكوني حذرة في اختيار الدكتور المتخصص لأن الموضوع حساس ومحتاج خبير يقدر يحدد نسبة احتياج بشرتك للكولاجين.

بعد ما اتعرفتي على أنواع الكولاجين لو استهوتك فكرة الإقدام على استخدامه لازم تعرفي فوايده وأضراره..

فوائد الكولاجين:

الكولاجين بيمثل 70% من تكوين الجلد عشان كده يعتبر من أهم المواد لتجميل البشرة، وبيستخدم في حالات التجاعيد، وترهلات الجلد وتوحيد لونه، وإزالة الهالات السوداء حول العين، وتغيير شكل الشفاه.

أضرار الكولاجين:

أغراض التجميل أكتر شئ لازم تأخدي حذرك وأنتي بتستخدميها، عشان كده لازم تعرفي الآثار الضارة اللي ممكن تحصلك من استخدام الكولاجين.

كريمات الكولاجين أثبتت إنها أسلم طريقة لاستخدامه لأنها طريقة ظاهرية، مش هيسببلك أي مشاكل داخل جسمك.

أما أقراص الكولاجين فبتسبب مشاكل في الجهاز الهضمي لأنك لازم تستخدميها فترات طويلة عشان توصلي للنتيجة المطلوبة، كمان بتسبب فقدان شهية فهتسببلك فقدان غير مرغوب فيه في الوزن.

وحقن الكولاجين لها مضاعفات ممكن تظهر في حالة إهمال من الدكتور، لأن في أنواع بشرة عندها حساسية من المنتجات الحيوانية، وده ممكن يسبب احمرار وانتفاخ في الجلد.