5 هدايا مبتكرة قدميها لحبيبك في عيد الحب

مع اقتراب عيد الحب كل اللي بيشغل بال المرتبطين هي الهدايا والخروجات وقضاء يوم جميل احتفالًا بحبهم.

إيه رأيك لو قدمتي السنة دي لشريكك هدية مختلفة تعبر له عن حبك ليه من غير ما تكلفك كتير؟

Chocolate tube

في أماكن بتقدم شوكولاتات بشكل مختلف.. زي "أنبوبة الشوكولاتة" وهي عبارة عن أنبوبة مليانة باودر شوكولاتة ملونة، بتقدميها لحبيبك علشان يفضيها على كوب اللبن ويحضر "هوت تشوكلت" بنكهة الحب. تقدري تشتريها أو تعمليها بنفسك.

ألبوم ذكريات

ممكن تبتكري طريقة جديدة تجمعي فيها صور لأجمل لحظات الحب اللي كانت بينكم وتكتبي قدام كل صورة الموقف اللي اتصورت فيه.

صندوق الحب

دايمًا الأكل هو أقصر طريق للتعبير عن حبنا.. ممكن تجمعي أكتر أكلات حبيبك بيحبها وتحطيها في صندوق أو "بوكس"، مش لازم تكون أكلات تقيلة ممكن أكتر أنواع شوكولاتات بيحبها أو ساندويتشه المفضل من مكانه المفضل.

بوستر لفيلمه المفضل

ابحثي عن بوستر فيلمه المفضل واطبعيه وقدميه له علشان يعلقه في أوضته ويفضل ملازمه وفاكرك بأكتر حاجة بيحبها.

أغانيكم المفضلة

جمعي على "سي دي" أكتر أغاني جمعت بينكم وتبادلتوها مع بعض وحبيتوها، وقدميها له مع رسالة مكتوبة بخط إيدك.