أغاني هتاخدك لاسكندرية وانتي في مكانك

اسكندرية مرتبطة عند معظمنا بفصل الشتا، آيس كريم عزة، والبليلة السخنة، والبن البرازيلي، وقهاوي محطة الرمل، والوقفة على الكورنيش بالساعات بنسمع "البلاي ليست" بتاعتنا والسماعات في وداننا.

عشان كدة جمعنالك أكتر أغاني هتاخدك لاسكندرية وانتي في مكانك..

"اسكندرية الصبية" حنان ماضي

أغنية مسلسل "البحار مندي" اللي غنتها حنان ماضي بصوتها الرقيق، و وصفت فيها كل تفاصيل اسكندرية وأهلها اللي بنحب طباعهم.

"شط اسكندرية" فيروز

طبعًا مينفعش نذكر اسكندرية، والشتا من غير ما نذكر فيروز اللي أغانيها بتكون أول اختيارنا واحنا في اسكندرية في الشتا.

"يا اسكندرية" محمد منير

"يا اسكندرية بحرك عجايب .. يا ريت ينوبني من الحب نايب" مين فينا ما قالش الجملة دي في حب اسكندرية؟

"عمار يا اسكندرية" محمد الحلو

المسلسلات المصرية مليانة بالعبقرية، ومن ضمن عبقريتها تترات المسلسلات اللي سابت جوانا بصمات ما تتنسيش، زي مسلسل "زيزينيا" اللي اتجسد في التتر بتاعه عشقنا لاسكندرية.

"اسكندرية" حازم شاهين

" قلبي بيرقص على شطك.. قلمي بيمشي على خطك

في المنتزه أول ميعاد ساعة ما كنّا صغيرين

كان ضحكنا يصحي البلاد.. ورجعنا تاني مشتاقين

لعفرتّك.. وشخبطتك

يا حكاية البحر الحزين.. حلمت يوم إني اصطادتك"

الكلمات اللي ترجعنا لأيام زمان في اسكندرية دي كتبها "أحمد حداد" حفيد الشاعر الكبير فؤاد حداد، وغناها حازم شاهين وفرقته "اسكندريلا" اللي -مش بالصدفة- اسمهم طالع من ريحة اسكندرية.

"اسكندرية المحروسة"

مسلسل "ريا وسكينة" اللي دارت أحداث قصته الحقيقية في مدينة اسكندرية الجميلة، واتجسدت القصة في أكتر من فيلم، وأخيرًا اتعملت مسلسل بطولة "عبلة كامل" و "سمية الخشاب"، وكانت أغنية تتر المسلسل من أجمل ما فيه، بصوت "خالد العجاج" شرحوا كل تفصيلة دايرة جوة اسكندرية، عشان يعيشونا جواها بالمعنى الحرفي.