تعرفي على أغرب عادات الشعوب في الاحتفال بالكريسماس

كل واحد مننا ليه طريقته في الاحتفال، وخصوصًا بالمناسبات اللي بتطول وبتسيب أثر مبهج في البيوت والشوارع، زي "الكريسماس". بس عمرك فكرتي مين غيرك بيحتفل بالكريسماس وبيحتفلوا ازاي؟

كل شعب وليه طريقته الخاصة في الاحتفال بعيد الكريسماس، عشان كدة "احكي" جمعتلك أغرب طرق للاحتفال بالكريسماس

إيطاليا

الشعب الإيطالي الجميل ما عندهمش "سانتا كلوز" أو "بابا نويل" بس عندهم الساحرة "بيفانا" وهي ساحرة بتدخل البيوت تقدم الهدايا للأطفال، وقبل ما تمشي بيضايفوها بشرب النبيذ، ولو الأطفال طيبين معاها بتكنسلهم أرضية البيت بالمنكسة السحرية الخاصة بيها.

البرازيل

في شوارع البرازيل الواسعة بيتم عمل مسابقات لأكبر شجرة كريسماس، وفيها السكان بيقوموا بتزيين أشجار الأرز الضخمة، وأكبر شجرة فيها زينة وإضاءة كتير، بتبقى أجمل شجرة وأصحابها بيكونوا الفايزين في المسابقة.

أستراليا

أستراليا بتشبه البرازيل في تجمع الناس في الشوارع وإقامة مسابقات، بس الاختلاف في نوع المسابقات، في أستراليا بيعملوا مسابقات في الجري، السكان الاستراليين بيلبسوا لبس "بابا نويل" ويجروا في الشوارع بهدف جمع التبرعات للأطفال الفقراء، وذوي الاحتياجات الخاصة في أجواء احتفالية.

أوكرانيا

كان في حكاية لطيفة بتتحكي عن ست أوكرانية كانت فقيرة جدًا ومش معاها حق تزيين شجرة الميلاد، فزينتها بخيوط العنكبوت، ومع طلوع أول شعاع للشمس وتعامده على الشجرة، اتحولت خيوط العنكبوت لخيوط من الدهب، ومن يومها والأوكرانيين بيتداولوا الحكاية دي بينهم وبيزينوا أشجار الميلاد بخيوط العنكبوت لاعتقادهم إنها بتجيب الحظ.

إسبانيا

الشعب الإسباني عنده تقليد يشبه تقليد الشعب الأوكراني في اعتقادهم بإنه بيجلب الحظ، لكن في اسبانيا متعودين ياكلوا 12 حبة عنب مع دخول السنة الجديدة، عشان حظهم يكون كويس.

تايلاند

في تايلاند متعودين يجلبوا حظ السنة الجديدة بحرب المياه، بيرموا على بعض أكياس مليانة مايه ولازم الكل يخرج من المعركة "مبلول".

الدنمارك

أما في الدنمارك فحظ السنة الجديدة بالنسبالهم بيكون عن طريق تجميع أكبر عدد من الأطباق الغير مستخدمة، وتكسيرها على الأبواب في ليلة 31 ديسمبر.