أفكار لـ ليلة مختلفة في رأس السنة مع أصحابك

مكسلة تخرجي في ليلة راس السنة.. الشوارع زحمة.. مفلّسة!.. عندك امتحانات.. تبقي أكيد منضمة لرابطة "الناس اللي هيقضوا رأس السنة في البيت"، بس ده مش معناه إنك هتقضي ليلة عادية مفيهاش شئ مختلف لإنك لو جمعتي صحابك عندك في البيت أكيد هتعملوا حاجات مش عادية.

عشان كدة "احكي" جمعتلك افكار تبدأي بيها سنة جديدة مع أصحابك في البيت..

• Movie Night

أكيد دي أول حاجة الصحاب بيحبوا يعملوها مع بعض، اختاري أكتر فيلمين شدوكي السنة دي ودوري عليهم لحد ما تجيبيهم، وحضري أكل و "سناكس" كتير من فشار، وبطاطس، وبيتزا، وتشوكلت كيك واجمعي بين متعة السينما ومتعة الأكل مع الصحاب.

• حفلة رقص شرقي

جمعي صاحباتك البنات وقضوا يوم بناتي وحضري بلاي ليست لأغاني شعبي وشرقي واعملوا مسابقة رقص بينكم.

• تجميع ذكريات

اتفقي انتي وصحابك تحضروا الصور اللي اتصورتوها على مدار 2017 وكل ذكري بينكم ممكن تتجمع و تتحط على لوحة خشبية، واسهروا يومها بتجمعوا في ذكريات 2017، وبتخططوا للحاجات اللي هتعملوها في 2018.

• سؤال وجواب

جمعي اسئلة متعلقة بأحداث حصلت في 2017 وحطيها في برطمان كبير وخلي أصحابك واحد ورا واحد يختار سؤال ويجاوب عليه بصراحة.

• حفلة شوي

حضري بالكونة بيتك أو سطح البيت، واعملوا حفلة شوي على ضوء شموع ومزيكا.

• مسابقة ألعاب

زي لعبة الكنز، خبّي حاجة في مكان ما في البيت وابدأوا رحلة البحث عنها، واللي هيقدر يوصلها يطلب من حد منكم طلب لازم ينفذه.

أو إن كل واحد يحكم على التاني بتقديم موهبة معينة حتى لو مش بيعرف يعملها، هيجرب، وهتطلعي من 2017 بموهبة جديدة اكتشفتيها في نفسك

تكتبي أسماء صحابك كلها وتحطيها في برطمان واختاروا اسم ورا التاني، واحكموا عليه إنه يقدم موهبة فنية حتى لو مش بيعرف يعملها.. هتطلعي من 2017 بموهبة جديدة اكتشفتيها في نفسك.

• Karaoke Night

حضري بلاي ليست للمزيكا بتاعة أغاني بتحبوها انتي وصحابك، و وصلي شاشة التليفزيون بالإنترنت وابدأوا اطربوا بعض بالمواهب الجميلة.

• حفلة تنكرية

كل اللي بيحبوا يحضروا الحفلات التنكرية بيكونوا بيدوروا على حاجة مختلفة، جمعي شخصيات كارتونية أو ملابس كلاسيكية، واتنكروا بيها وجهزوا مزيكا تليق مع الأجواء اللي هتختاروها.

• افتكاسات في المطبخ

اختاري انتي وصحابك أكلات جديدة وقرروا تعملوها بإيديكم ليلة راس السنة، وحاولوا تتجنبوا التلبّك المعوي.