رجال لمعوا في أدوار الجنس الناعم

الفنون جنون زي ما بيقولوا وعشان كدة الفنان الشاطر بيعرف يتلون ويتجنن ويطلعلنا بأعمال مُبهرة فيه منها إللي بتسيب أثر عميق في قلوب المُشاهدين وفي منها إللي بترزع البسمة على وشوش الناس ومش بس مُجرد بسمة لأ دي بتسيب علامة وذكرى تموت من الضحك ومن أكتر الأدوار الكوميدية إللي بتعلم أوي مع الناس إللي بيقدم فيها راجل شخصية " ست" ومن أشهر الفنانين إللي أبدعوا في الأدوار دي :

1-جورج سيدهم : وهو الأشهر على الإطلاق في تأدية أدوار "المرأة" سواء من خلال إسكتشات "ثلاثي أضواء المسرح" أو الفوازير الإذاعية إللي قدمها في أواخر الستينات ومطلع السبعينيات من القرن الماضي وأدواره دي سابت علامة مميزة جدًا في قلوب متابعيه وبالذات سكيتش " كوتو موتو يا حلوة يا بطة" .

2- الفنان الراحل "علاء ولي الدين" : وده  من خلال دور "جواهر" إللي أداه في فيلم "الناظر" سنة 2000 ومن خلال الدور دة  أصبح ل "ولي الدين" و"جواهر" مكانة خاصة لدى مُعظم الشعب المصري وبخاصة السيدات إللي حافظين قفشات الأفلام وبتلاقيهم ساعات بيكرروا إيفيهات جواهر زي " تتحرق فوفا أكتر ما هي محروقة" أو "و دة دكتور ولا عيان " أو " والنبي لاضربها على بقها الولية دي "  .

3- الفنان الأمريكي الراحل " روبن ويليامز" : و ده عن طريق تأديته لدور المُربية  الطيبة "Mrs Doubtfire " بالفيلم إللي بيحمل نفس الاسم وده كان  سنة 1993 ولاقى الدور دة  نجاح  عالمي بالذات بين الأطفال .

4- الفنان العالمي "جون ترافولتا" : وده من خلال  مشاركته بدور "إيدنا" أم الفتاة الطموحة "تيريسي ترينالد" إللي كانت بتحلم إنها تبقى فنانة استعراضية مشهورة رغم زيادة وزنها بتنجح بالفعل إنها تقلل وزنها وتبقى فنانة إستعراضية زي ما كانت عايزة وده في فيلم " Hairspray" وإللي  صدر عام 2007 وهو مأخوذ عن مسرحية غنائية وفيلم بيحملوا  نفس الاسم .

5 -النجم المصري الصاعد "إسلام إبراهيم" : وإللي ذاعت  شهرته في تقديم الأدوار النسائية ببراعة من خلال اسكتشات كوميدية في برنامج "SNL بالعربي " .

6- وطبعًا لا يمكن ننسى هنيدي إللي قدم أكتر من شخصية نسائية بجدارة لدرجة خلتنا ندمع من كتر الضحك وأبرزهم شخصية "الخالة نوسة" في الفيلم إللي بيحمل نفس الاسم وإللي صدر سنة 2005  وشخصية "الخالة نعيمة" في مسرحية " ألابندا" وإللي صدرت سنة 1998 و"أم فراس " في فيلم "صاحب صاحبه" إللي صدر سنة 2002   .

7- محمد سعد بتأديته لشخصية الجدة العجوزة "أطاطا"  قدر إنه يدخل قلوب المصريين بشكل جديد عن إللي إتعودوا عليه فيه من خلال تأديته لشخصية "اللمبي" إللي مثلها في أكتر من فيلم .

8- مسرحية "حزمني يا " كانت من ضمن المسرحيات إللي علمت مع معظم الناس لدرجة إن لو المسرحية بتتعرض أكتر من مرة في اليوم ممكن الناس تشوفها وبالذات مشاهد الثلاثي " مدحت صالح" و"شريف منير" و"محمد هنيدي " إللي أدوا

فيها شخصية "سونيا "وطبعًا سونيا بكل تفاصيلها كانت قنبلة كوميدية من العيار التقيل .

9- فيلم "حرب الفراولة" على الرغم من كونه فيلم يحمل مخزى عميق جدًا إلا إن المشاهد إللي قدمها " سامي العدل " و"محمود حميدة" في شكل ستات كانت كوميدية جدًا.

10- وأخيرًا الثنائي المكون من "هاني رمزي" و"ماجد المصري "في فيلم" فرقة بنات وبس " قدر إنه يقدم الست في شكل كوميدي جدًا جدًا وقدر إنه يرسم البسمة على وشوش كل إللي شافوه .