6 نصائح عشان تحافظي على زواجك

الزواج مش سهل، والحفاظ عليه بيحتاج مننا مجهود كبير، لأنه عشان اتنين يعيشوا مع بعض ويتقبلوا تصرفات بعض والعيوب قبل المميزات، أمر صعب شوية، خاصة، لو كل طرف بيتمسك بموقفه، وعاوز يغير التاني.

أكيد، صادفنا حوالينا جوازات كتير بتنتهي عشان مقدوش يتفاهموا، ويعدوا الفترات الصعبة، ويتقبلوا اختلافهم عن بعض، وبقين نخاف بببها من فكرة الزواج. وعشان زي ما الزوج له دور في نجاح الزواج، الزوجة كمان ليها دور، لازم تعرفي إيه النصائح اللي ممكن تتبعيها عشان تتعاملي مع زوجك بطريقة تبني البيت وتحافظ عليه.

وممكن تحاولي تستخدمي النصائح دي:

1. أولا، لازم تتعاملي مع زوجك كصديقة مش أم، لأن الأزواج بيكرهوا أسلوب الأم اللي بيعاملهم كأنهم أطفال وبيغلطوا ولازم تصحح لهم أخطاءهم.
2. حاولي تقدري اللي بيقدمه وبيعمله لبيتك وأسرتك، ومتكونيش أنتي سبب الضيق والإزعاج، خاصة، لو هو بيواجه ضغوط في شغلك عشان يوفر لك حياة مريحة، فهتلاقي ردود فعله عصبية، وعشان كده تعاملي معها بهدوء مش بطلبات زيادة وتقليل من اللي بيعمله.
3. اقفي جنبه، وبلاش تنتقدي كل حاجة بيعملها، على العكس، مهما كان اللي بيقدمه بسيط قدريه، وحاولي تحفزيه في شغله وتديله اعتباره وقيمته قدامك وقدام نفسك.
4. طبعا، أكتر تصرف بيكرهه الأزواج هو أنك تحاصريه، أنك تكوني صديقة ليه مش معناه أنك "تلزقي له"، وتكوني معاه في كل مناسبة وأي مكان يخرج ليه. المفروض أنك تسيبله مساحته وهو كمان يعمل كده معاكي عشان متحسوش أنه الزواج تقيل.
5. لازم يكون عندك تقبل لتصرفاته، وإذا كان في سلوك تتمني يتغير يبقى لازم يكون عندك الصبر، وتديله وقته، طالما هو كمان متفق معاكي على تغيير السلوك ده، في أنه يغيره ويتعامل معاه.
6. الزواج مسئولية مشتركة بينكم، يعني فشله أو وجود خلل فيه نتيجة أنتم الاتنين السبب فيها، عشان كده لازم تكوني مساندة ومساعدة لزوجك، ومتفتكريش أنه المركب لو غرقت هتغرق بيه لوحده.