9 أسباب تخليكي تتمسكي بطموحك مقابل علاقتك العاطفية

في العلاقات العاطفية، بنلاقي نفسنا بتنازل عن حاجات كتير في مقابل الحصول على علاقة مريحة نحس فيها بالسعادة، وأن شريكنا قادر يفهمنا والتواصل ما بيننا سهل، ومن غير عقد أو كلاكيع، لكن في لحظة بنحس فيها أننا خلاص مش هنقدر نتنازل أكتر، خاصة، لو الموضوع كان متعلق بشغلنا وطموحنا العملي.. هنا لازم نعيد تفكيرنا مرة تانية.

الشغل مش زي الأول، وشغل أي ست مبقاش رفاهية، أو حاجة ممكن تتنازل عنها، وأي علاقة عاطفية يطلب فيها شريكك أنك تسيبي شغلك أو تتخلي عن مميزاته، لازم تفكري فيها مرة تانية، مهما كان فيها الطرف التاني بيحبك ومعطاء، وده لأسباب كتير هنشرحها ونتكلم فيها، لكن يمكن أهمها هيكون أنه بكده يكون مش فاهمك ومش مقدر طموحك ولا قادر يتعامل مع نجاحك.

تعرفي على: حاجات هتساعدك تتحولي من شخصية مترددة لشخصية حاسمة

العمل أهم من الحب

بنات وستات كتير يمكن تختار الحب، باعتباره شعور مش هيتعوض، بس إزاي ممكن أختار شريك مش قادر يقبل اختياراتي المتعلقة بالشغل، ويقدر طموحي، وإزاي كمان أنه سغلي يكون داعم أكبر ليا من علاقة عاطفية هتهدمني وتحطم كياني، الموضوع بالتأكيد نسبي، وكل شخص بيختار المناسب ليه واللي قادر يتعامل معاه.

في الموضوع هنا، هنركز على الأسباب اللي تخلي اي ست ناجحة في شغلها وعندها طموح كبير تعيد التفكير مرة تانية تجاه علاقتها العاطفية، خاصة، غذا كانت علاقة مرهقة ومش مجدية، وهنقولك إزاي طموحك أفضل لك.

عائد حقيقي

الشغل في حاجة بتحبيها هيخليكي قادرة طول الوقت تحسي بالحماس، خاصة، لما تلاقي العائد  من ترقيات أو زيادة في مرتبك ومناصب أعلى.. ببساطة اللي بتزرعيه بتلاقيه، على عكس علاقة عاطفية ممكن تقدمي فيها كل جهدك، وفي النهاية ميتقدرش ولا يتعمل حسابه.

الشغل مش هيسيبك

كم مرة لقيتي أنك بتقدمي وبتضحي وتحاولي تسعدي الطرف التاني، وفي لحظة، يسيبك من غير أي شعور بالندم، وينسى كل تضحياتك والمجهود اللي عملتيه عشان علاقتكم.. مستبعد أنه ده يحصل في شغلك، اللي طالما قدمتي له هتلاقي اللي تستحقيه، والتزامك ناحيته هيقبله التزام من ناحيته، ومش هيصحى في يوم ينساكي وكأنك مكنتيش، على العكس الخبرة في شغلك هتكون سلاحك في أي مكان تاني بعد كده.

الحماس

لما يكون عندك هدف في شغلك، وبتقدري تحققيه بخطوات ثابتة، هيكون ده دافع ليكي كل يوم انك تتطوري وتتعلمي وتغيري نفسك للأفضل، وهتكوني قادرة تحبي اللي بتعمليه، وعندك حماس تصحي كل يوم الصبح.. بدل علاقة عاطفية تحاولي تحسينها وتشتغلي عليها ولكنها برضة مرهقة ومش بتحقق أي نتيجة، على العكس، بتضعفك وتقلل منك.

اقرئي أيضا: علامات تدل على علاقة صداقة مرهقة وغير صحية 

الشعور الحقيقي بالسعادة

لما تكون سعادتك معتمدة على فرد فانتي في خطر، لكن لما تكون سعادتك جاية من النجاحات اللي انتي قادرة تحققيها بنفسم، فالشعور بالسعادة هيكون مختلف وحقيقي، خاصة، أن الأشخاص مش مضمونين على الإطلاق.

شخص أفضل

طول ما أنتي بتعملي شغل بتحبيه، هتكوني قادرة تبقي شخص افضل على مستويات كتير، هتحبي تتعلمي أكتر، هتكوني قادرة تساعدي اللي حواليكي، وكمان هتقرأي اكتر، وتتجهي لحياة صحية، ويكون عندك اختيارات كتير للتجربة والتعلم.

الشغل علاج

وقت الحزن والضيق بيكون طويل، ومش قادرين نتخلص فيه من مشاعرنا السلبية، لكن الشغل ومحاولاتك اليومية عشان تنجحي هتصرف انتباهك عن أي شعور تعيس، وتخليكي تركزي مع الخطوات اللي هتنجحك، فالوقت هيعدي والحزن هيبقى أقل.

مثال للي حواليكي

نجاحك في شغلك، والجري ورا طموحك هيديكي خبرة كبيرة في التعامل مع الحياة وخبطاتها، فهتكوني مثال للي حواليكي يحبوا يكونوا زيه، ويعرفوا منك إزاي قادرة تنجحي، وده هيخليكي حافز ليهم كمان.

مساهمة حقيقية

حياتك المهنية الناجحة هتكون زي الإرث اللي أنتي سبتيه بعد سنين طويلة، وهتحسسك أنك أضفتي قيمة ومساهمة حقيقية، خاصة، لو كنتي قدرتي تعمل إنجازات مهما كانت صغيرة.

اقرئي أيضا: انسكيورتي بتعيشها الستات بشكل مستمر 

هتلاقي اللي يحبك

شغلك ونجاحك مش هيبعدك عن انك تلاقي الحب المناسب، لكن مهم يكون عندك دموح في شغلك وقادرة تحققي نجاح، عشان متتخيليش أنه العلاقة العاطفية هي أهم حاجة، وانه شريكك هو مصدر الكون والحياة، اخلقي حياتك بنفسك، واختاري اللي يشاركك فيها بعناية.

اقرئي أيضا:

خناقات يومية بين العقل والقلب محتاجين نحسمها 

التعامل مع شخص يقلل من قيمتك ولا يقدرك