أسئلة تخليكي تعرفي هو بيحبك فعلا أو لأ

في علاقات الحب مع الطرف الآخر، ومهما كانت المرحلة اللي وصلتولها، سواء كانت بداية الإعجاب والحب، أو في منتصف العلاقة، أو بعد مرور سنين. ساعات بنحتاج نتأكد من حب الطرف التاني لينا. عشان كده النهاردة حبيت أشركك ببعض الأسئلة اللي ممكن إجاباتها توضحلك إذا كان شريكك بالفعل بيحبك حب حقيقي أو لأ...

ايه اللي بيجذبك ليا؟

إجابة شريكك على السؤال ده هتوضحلك هو بيحبك ليه. ممكن يكون على شكلك أو مظهرك بيلفت انتباه. وممكن يكون عشان حاجة مُعينة في شخصيتك. أو صفات بيحبها فيكي. وممكن يكون بيحبك من غير أسباب، أو عشان بيحس معاكي بالارتياح أو بالسعادة في وجودك. الخُلاصة أن مهم تعرفي إجابة السؤال ده لأنها هتوضحلك حاجات تانية كتير.

ايه مفهومك عن العلاقة العاطفية الصحية؟

الإجابة دي هتعرفك مفهوم شريكك عن العلاقة العاطفية، وإذا كان فاهم الحقوق والواجبات اللي المفروض تكون موجودة عن الطرفين أو لأ. كل ده هيوضحلك حاجات كتير، لأن أوقات بيكون فعلا شريكك بيحبك بس بتبقى اللي إحنا بنسميه دلوقتي "علاقة توكسيك" يعني بيحبك بس أناني، بيحبك بس بيخونك، بيحبك بس عايز يسيطر عليكي. عشان كده لازم تفهمي منه مفهومه عن العلاقة العاطفية الصحية.

اقرئي أيضا: 7 عادات في العلاقات نعتقد أنها صحية ولكنها توكسيك

هيبقى أحسن بالنسبة لك لو اتغيرت عشانك؟

إجابة السؤال ده مهمة جدا، منها هتعرفي ايه الحاجات اللي شريكك بيكرهها فيكي، وهل عنده استعداد يتقبلك زي مانتي أو لأ. وهل هيحاول يغيرك فعلا أو لأ برضو. صحيح بعض الناس مايقدروش يتأقلموا مع بعض الصفات في شريك حياتهم، بس في نظرية تانية برضو بتقول أن اللي بيحب حد بيحبه زي ما هو.

هتقبلني زي مانا في أي ظروف؟

رجالة كتير ممكن نظرتهم لشريكة حياتهم تتغير مع ظروف متغيرة، وخصوصا بعد الجواز، زي مثلا الحمل والولادة والآثار اللي بتسيبها الفترة دي على الست. في رجالة ممكن تتغير كمان لما الست تُصاب بأي مرض ممكن يغير شكلها. وعشان كده السؤال ده من أهم الأسئلة اللي المفروض تسأليها لشريك حياتك. هل هو مستعد يقبلك ويفضل يحبك حتى لو شكلك اتغير؟ حتى لو مريتي بأوقات صعبة؟ اعرفي منه...

شايف علاقتنا ازاي؟

يمكن يبان سؤال عميق شوية، لكن مهم. مهم تعرفي وجهة نظر شريكك في علاقتكوا، ايه الحاجات اللي بيحبها وايه الحاجات اللي بيكرهها. هل شايف ان علاقتكوا روتينية، ولا انتوا اتنين صحاب بتقدروا تتكلموا في أي حاجة. والأهم، شايف مستقبل علاقتكوا ازاي وايه اللي ممكن يتحسن بينكوا في المستقبل. 

اقرئي أيضا: 10 أسباب تجعلنا لا ننسى الحب الأول

لو حصلت مشكلة بيننا ازاي نقدر نحلها؟

واحد من أهم الأسئلة اللي المفروض تعرفي إجابة شريكك عليها، هو رد فعله أو طريقة تصرفه في حالة وجود أي مشكلة بينكم. الوقت ده اللي بيبان فيه فعلا مين بيحب التاني، ولو العلاقة دي فعلا صحية أو لأ. المشاكل هى اللي بتفلتر العلاقة العاطفية بين الطرفين، فلو شريكك إجابته كانت أن أي مشكلة تقدروا تحلوها سوا بدون تدخل طرف تالت وأن طالما أنتوا مع بعض يبقى التفاهم هيكون موجود، فده معناه أن عقلاني وبيحبك فعلا والمشاكل مش هتخليه يبعد.

شايف مستقبل علاقتنا فين وازاي؟

لو كنتوا في بداية العلاقة العاطفية، فإجابة السؤال ده هتحددلك إذا كان شريكك ناوي على علاقة جدية وارتباط وجواز، أو أنه بيخاف من الارتباط والمسئولية، أو حتى العلاقة بالنسبة له مش جد. وعشان كده لازم تسأليه السؤال ده باهتمام وتاخدي إجابة تفهمك الدنيا ماشية ازاي في علاقتكوا.

اقرئي أيضا: بعد العلاقات التوسكيك... هذه المخاوف تسيطر عليك

التبرير المستمر أولى خطوات فشل العلاقة العاطفية

5 أنواع من الباد بويز اللي ممكن تقابليهم في حياتك