7 طرق تستعيدي بها حياتك العاطفية بعد الطلاق

ممكن يكون الطلاق هو أصعب تجربة تمري بيها، لكنه حقيقي قادر يغير نظرتك لكتير من الأمور والتفاصيل المتعلقة بحياتك، ويمنحك فرصة تانية تعرفي نفسك من جديد، وتتقبلي عدم نجاحك وفقدانك القدرة على الصمود، وتتعاملي مع الواقع اللي ممكن يكون مؤلم وجارح وصادم، لكنه كمان مش نهاية العالم ولا آخر الأحلام.

صدمة الطلاق والانفصال، خاصة، لو عن شخص بتحبيه وكانت بتجمعكم مشتركات وتفاصيل كتير، تعتبر صعبة ومجهدة نفسيا، وعشان تقدري تتخطيها وتتعاملي معاها هتحتاجي تكوني أقوي، وتفهمي أنه حصل لأنه كان أفضل الاختيارات، وأنسبها ليكي في الوقت الحالي، والمهم أنك تبدأي تتعافي من صدمته، وتعرفي إزاي ممكن تستعيدي حياتك مرة تانية، خاصة، العاطفية؟

تعرفي على: البريك في العلاقة العاطفية.. قرار صح ولا مؤذي؟

حياتك العاطفية بعد الطلاق

قسوة الطلاق، من الممكن أنها توصل بيكي للإصابة بالاكتئاب، لما تحسي أنك فشلتي وفقدتي القدرة على الحفاظ على علاقتك بأهم شخص في حياتك، ووصلتي لدرجة فقدان ثقتك في نفسك، بعد ما شعورك أنك قليلة وغير كافية لأي علاقة عاطفية يزيد، ويتحول الموضوع لصدمة وهزة نفسية كبيرة تخليكي تشوفي كأنه العالم كله بينهار من حواليكي.

محتاجة تكوني متأكدة، خلال فترة ما بعد الانفصال، أن المشاعر السلبية اللي ممكن تحسي بيها كلها مصيرها للزوال، وأنها هتختفي وهيكون مكانها الثقة والأمان في يوم من الأيام، وهتقدري تتخطي الحزن، لكن الأمر كله معتمد على قوتك ودعم اللي حواليكي ليكي، وتؤمني أنه أكيد هتقدري تحبي من جديد، ويكون ليكي حياة عاطفية مستقرة.

بالتأكيد، الموضوع مش سهل ومحتاج وقت ومجهود، لكن دي مجموعة من الطرق والخطوات اللي ممكن تساعدك:

حبي نفسك

رحلة ما بعد الطلاق، ومرورك بمشاعر وأوقات صعبة كتير، بتتطلب أنه يكون في دعم من المحيطين بيكي، وبتحتاج أنك كمان تحبي نفسك وتتقبليها، مهم تعرفي سبب انفصالك وتحول حياتك، وتكوني كمان قادرة تتخطيه، وتفكري إزاي تسعدي نفسك، وتعملي اللي يرضيكي ويريحك.

الكلام مع متخصص

أوقات لأننا بنكون جزء من الموضوع، مش بنقدر نشوف الصورة كاملة، وبيكون حكمنا على نفسنا وعلى التجارب اللي عيشناها شخصي بحت، ومش بنقدر نفهم وجهات النظر التانية، وعشان كده هتحتاجي تتكلمي مع متخصص في العلاقات الزوجية أو متخصص تفسي، عشان يقدر يساعدك على تخطي الفترة دي، وفهم نفسك بصورة أفضل، فتكوني مستعدة بشكل سليم للدخول في أي نوع من العلاقات.

الخوف من الرفض

via GIPHY

من الممكن أن الخوف من الرفض يكون سبب في تراجعك عن الدخول في علاقة جديدة، لأنه هيكون صعب مرة تانية التعامل مع مشاعر سلبية هتسبب لك عدم الثقة في نفسك، وعشان كده هتحتاجي تتأكدي أنه الرفض ملوش علاقة بشخصك، وأنه تجربتك السابقة كانت نتيجة اختيار غير موفق، وده معناه ضرورة أنك تختاري اللي يناسبك في مرة تانية.

الحب بلا معنى

بعض الناس، بعد الطلاق بتبدأ تشوف أنه الحب والعلاقات العاطفية أمور السعي وراها ملوش معنى أو نتيجة، وبيتسلل لها الشعور بالانهزام وأنه العناء في البحث عن حب حقيقي مش هيكون ليه نتيجة مثمرة وإيجابية، وده اللي بيوقفهم عن تجربة الدخول في علاقة جديدة، لكن الواقع أنه دي فترة هيتم التخلص فيها عن طريقة التفكير السلبية دي لما الشخص يلاقي إنسان يناسبه حقيقي ويقدره  ويقبله ويحبه ويسعى للتقرب منه.

وقت محدد

مفيش وقت محدد أو إطار زمني تقدري تقولي أنك بعده قادرة تدخلي علاقة عاطفية جديدة، الموضوع معتمد على تجربة كل شخص الفردية، واللي بيحددها مدى ارتباطك بشريكك أو زوجك السابق، ومدى قدرتك على تخطي وتجاوز المشاعر اللي كنتي بتحمليها له، وكمان فهمك الجيد أنه نسيان شخص مش بحب شخص جديد، وعشان كده لازم تاخدي وقتك الكامل في التخلص من مشاعرك، عشان تقدري تحددي أنك مستعدة للدخول في علاقة جديدة.

المشاركة في أنشطة جديدة

مهم لصحتك النفسية، أنك تبدأي البحث عن أنشطة ممكن تعمليها تشغلي بيها وقتك، وترجعي لاهتمامات كنتي أهملتيها، ده هيفيدك في أنك تكوني صداقات جديدة، وتطوري من نفسك، وتعرفي أن الحياة موقفتش عند حد معين، وأنك تقدري تستعيدي من جديد نفسك، وتشوفي جوانب مختلفة إيجابية للطلاق، غير أنه الأنشطة دي ممكن تكون طريقة أنك تلاقي شخص مناسب.

شروط جديدة

في المرة التانية، أهم حاجة متقبليش الدخول في علاقة عاطفية أنتي مش مرتاحة فيها، في بحثك عن الحب مش لازم تقدمي تنازلات، وارفضي أي تعامل سلبي أو غير مُرضي ليكي، واهتمي يكون في شروط جديدة أنتي محدداها لنفسك عشان تحاولي متقعيش في تجربة صعبة للمرة التانية، وميكونش الخوف من الوحدة دافع أنك تورطي نفسك في علاقات غير مناسبة ليكي.

تقدري بعد الطلاق تستعيدي حياتك العاطفية، وترجعي تاني تحسي بالسعادة، المهم أنك تبدأي الخطوات اللي تساعدك.

اقرئي أيضا:

حاجات تاخدي بالك منها لو هترتبطي براجل أصغر منك 

8 خطوات للتعامل مع الشريك الغارق في الانسكيورتيز