دروس في العلاقات اتعلمناها من فيلم You've Got Mail

تستيقظ كاثلين كيلي يوميا بنشاط لتستمتع بمدينتها المفضلة نيويورك التي تزدهر في فصل الخري، ولتذهب وتطلب قهوتها المُفضلة من مقهى ستار باكس، ثُم تذهب لمكتبها الصغيرة “The shop Around the Corner” وتبدأ يومها بشغف وحماس متغاضية عن أي سلبيات وفي انتظار شىء سعيد على وشك الحدوث و... بريد إلكتروني!

1- مش لازم نبقى شبه بعض في كل حاجة

فكرة توأم الروح مش أساسية في العلاقات العاطفية، إحنا شوفنا قد ايه كاثلين كيلي رومانسية وعاطفية وعندها حب وشغف كبير لشغلها وحياتها. وفي نفس الوقت جو فوكس راجل عملي جدا وبيحسب كل حاجة وبيخطط قبل ما يتصرف. لكن ده مامنعش الاتنين يقعوا في حب بعض!

2- التفاصيل بتفرق كتير

في واحد من أحلى المشاهد الرومانسية على الإطلاق، جو فوكس قرر يزور كاثلين كيلي وجابلها ورد! بس مش أي ورد، جبلها Daisy النوع اللي بتحبه بالتحديد. كانت معلومة عابرة قالتها كاثلين قدام جو في أول مرة يتقابلوا في المكتبة بتاعتها لما طلعت منديلها القماش وقالت أن جدتها طرزت عليه وردتها المفضلة Daisy. تفصيلة بسيطة لكن مهمة وده اللي بيفرق في علاقة عن التانية!

3- الصراحة مع الشريك 

طبعا مابقصدش هنا علاقة جو وكاثلين كيلي ببعض، لكن قصدي على كل واحد فيهم بحبيبه السابق! كاثلين كيلي قعدت مع فرانك نافسكي وصرحتله بأنه مابتحبوش ومش هتقدر تكمل معاه، وهو كمان كان صريح معاها والموضوع خلص بمنتهى البساطة. وفي نفس الوقت جو فوكس عمل نفس الحاجة مع حبيبته. مش لازم نكدب ونخون عشان مابنقدرش نقول الحقيقة!

4- الاهتمام

رغم ان علاقة جو فوكس بكاثلين كيلي كانت في البداية مافيهاش كتير من الحب أو الاهتمام لأنه راجل عملي جدا. إلا أنه مع الوقت قدر يكون جزء كبير من عالمها وقد يخليها تحكيله عن تفاصيلها وأسرارها. جو فوكس بكل بساطة عرف يوريها الجانب الآخر من شخصيته اللي بيعرف يحب ويهتم، وده ظهر لما راح زارها وهى عيانة، أو لما بدأوا يرتبوا مواعيد ويخرجوا مع بعض وكما لما بدأ يناقشها في حاجات كتير من اللي هى مهتمة بيه زي الكتب والأفلام.

5- القلب والعقل مع بعض 

الخناقة بين العقل ولا القلب مابتخلصش! لكن جو فوكس وكاثلين كيلي أثبتوا أن الاتنين بيكملوا بعض. كاثلين كيلي كانت دايما بتمثل الجانب العاطفي المليان حياة وطاقة واللي الحب دايما بيحركها. أما جو فوكس فالعملية والعقل بيغلبوا على تفكيره دايما. بس كل الفروق دي بتذوب لما بيحبوا بعض وكل واحد فيهم بيلاقي في التاني حاجة تشده ليه، وده بنشوفه في الكيميا اللي بقيت بينهم لما بدأوا يتقابلوا ويخرجوا مع بعض.

6- الحب بيخلينا نسامح

في ناس كتير ممكن تشوف أن اللي عمله جو فوكس لا يُغتفر وأنه هدم لكاثلين كيلي مشروع عمرها اللي مش بس يعتبر مصدر دخل ليها لأ ده كمان بيحمل ذكريات كتير ليها مع مامتها. لكن هى قدرت تسامح لدرجة أنها اتمنت أن حبيبها اللي مستنياه يطلع هو جو فوكس بعد ما علاقتها معه بقيت قوية. مش بنقول ده صح أو غلط لكن اللي نتعلمه أن الحب في أحيانا كتير بيخلينا نسامح ونغفر خصوصا لما بنشوف الوش الطيب من الشخص اللي بنحبه.

اقراي ايضاً: 

المشكلات المشتركة التي تقابلها كل العلاقات

فوائد ممارسة العلاقة الحميمة في الشتاء