ونحب تاني ليه؟... 7 أسباب تخلينا نحب تاني

الكلام عن الحب والرومانسية والعلاقات العاطفية المختلفة كان حديث مسلسلات رمضان 2020. بس ياسمين عبدالعزيز سألت سؤال مهم السنة دي، وهو "ونحب تاني ليه؟" والحقيقة أننا لازم نقف عند سؤال زي ده ونجاوب مدام ياسمين. لأن في أسباب كتير أوي تخلينا نحب تاني، في حالة أن الحب الأول ماكنش كفاية. بس يا ترى ليه ممكن نحب تاني؟

الحب مرة ثانية

دي بعض الأسباب اللي ممكن تشجعنا نقع في الحب مرة تانية...

1- علشان جربنا نعيش الحياة مع شريك

مبدأيا لازم نوضح أن ده مش حكم عام، وفي ناس بتقدر ترجع تكمل لوحدها بعد الانفصال في أي علاقة. لكن برضو ماننكرش أن تجربة مشاركة تفاصيل الحياة مع شريك بنحبه ويحبنا حاجة حلوة وبنفتقدها حتى لو العلاقة خلصت بمشاكل. عشان كده الحب تاني هيخليكي ترجعي تشاركي تفاصيل يومك وحياتك مع حد بتحبيه وفي بينكوا حاجات مشتركة، بس المرة دي يبقى نسبة التوافق أعلى.

2- الحياة بتستمر ومابتقفش على حد

نهاية أو علاقة عاطفية مش نهاية الدنيا! يمكن معظمنا بيدخل أول علاقة حب في حياته وكأنها العلاقة الأبدية اللي هتستمر طول العمر، وده بيكون أكبر سبب يحسسنا بالخسارة لو العلاقة دي انتهت. وده برضو أهم سبب أننا نرجع نحب تاني، عشان مانحسش أن حياتنا وذكرياتنا مرتبطين بعلاقة واحدة عدت، بالعكس ده ممكن نلاقي جد تاني نحبه أكتر ونعمل معاه ذكريات جديدة، وحياة أحسن.

اقرئي أيضا: البريك في العلاقة العاطفية... قرار صح ولا مؤذي؟

3- بنبقى نضجنا وفهمنا حاجات كتير

أول مرة بنحب بنعيش التجربة بإحساس اللي بيكتشف حاجة جديدة مايعرفهاش قبل كده. بتبقى مشاعرنا فطرية شوية، وسقف التوقعات عالي أوي. عشان كده كل المشاكل اللي بتواجهنا في أول علاقة حب بنتعامل معاها كمبتدئين، ولو العلاقة انتهت ده بيبقى بسبب أن تعاملنا مع المشاكل كان غلط لدرجة ان العلاقة بقيت مستحيلة.

لكن لما بنحب تاني الموضوع بيختلف، بيبقى عندنا تجربة سابقة ناخد منها الحلو ونسيب الوحش. نتعلم من أخطاء عملناها قبل كده ومانكررهاش تاني، وبنحاول نحل أي مشكلة تظهر بسرعة عشان نعرف نكمل صح.

4- معايير اختياراتنا بتختلف

اختيارنا لأول حد حبناه بيكون مبني على معايير ليها علاقة بالسن اللي بنعيشه وخبرتنا في الحياة ومتطلبتنا في الشخص اللي عايزين نكون معاه عموما. أما في الحب التاني فمعايير اختيارنا بتختلف، أو بمعنى أصح بتبقى ناضجة أكتر، أو مبنية على خبرة أكبر في الحياة. بنكون عرفنا احنا عايزين ايه، ومين اللي نقدر بجد نكمل معاه، وليه عايزين شريك حياة مش مجرد زوج أو حبيب. 

اقرئي أيضا: ليه المفروض مايبقاش عندك ريليشن شيب جولز

5- بنحب اللي بنقدر نكمل معاه

في حالات كتير، أول قصة حب حقيقية بنعيشها بتأثر فينا وفي حياتنا أوي. لأنها بتكون شكل جديد من العلاقات ماعيشناهوش قبل كده، ولما بنحب مش بنبقى عارفين أوي احنا بنحب ليه، الموضوع بييجي لوحده وبنلاقي نفسنا بنتشد لحد مُعين وبس.

وده بيتغير تماما لما بنحب تاني، عشان في المرة التانية وأي مرة بنحب فيها بعد كده، غالبا بيكون اختيارنا مش للحب وبس. بنختار الشخص اللي بنقدر نكمل معاه، اللي بنحس معاه أننا أحسن. الشخص اللي فاهمنا وقادرين نتواصل وفي بيننا لغة مشتركة. غالبا الاختيار التاني بنحاول نتفادى فيه أخطاء الاختيار الأول وندور على كل حاجة بتريحنا، لأننا مش بنقدر نستحمل تاني علاقة بتضغط على أعصابنا.

6- نكتشف نفسنا من جديد

فكرة اننا بنكتشف نفسنا هى حاجة بتحصل باستمرار من بداية الحياة لنهايتها. وفي أول علاقة حب وحتى لو فشلت كل ده بيعرفنا أكتر على نفسنا واحنا نقدر نعمل ايه. أما في الحب مرة تانية ف احنا بنقدر نكتشف قدرتنا على أننا نحب تاني، وندي تاني، ونعيش من جديد. 

اقرئي أيضا: علامات بتقولك أنه مش الزوج المناسب

7- علشان الحب حلو لو مع الشخص صح

تجربتنا السيئة مع الحب الأول، ممكن تكون أقوى دافع لينا عشان نرجع نحب تاني. ببساطة لأن الحب شعور جميل جدا بس لو مع الشخص الصح والمناسب، ولأن لما بنحب حد كويس بنحب نفسنا أكتر معاه، وعشان كده لازم نحب تاني وتالت ورابع ممكن لحد ما نلاقي الشخص اللي قادرين نكمل معاه ونديله أجمل ما فينا.

قوليلنا رأيك في الحب مرة تانية في التعليقات...

اقرئي أيضا: 7 طرق تستعيدي بها حياتك العاطفية بعد الطلاق

ازاي تعبر عن حبك بطرق مختلفة غير كلمة بحبك؟

ما هى طربيعة العلاقات الصحية؟