7 حاجات ممكن نتعلمها من فيبي بوفيه في مسلسل فريندز

فريندز هو المسلسل المفضل لكتير مننا، فعلى مدى 10 مواسم عيشنا مع شخصياته تفاصيل حياتهم، حبيناهم بكل تصرفاتهم ومواقفهم، بحلوها ومرها، وطبعًا كل شخصيات المسلسل كان لها حضور طاغي وخاص بيها ووجودها مفيش شخصية تانية تعوضه، وكل واحد في الأصحاب الـ6 كان مميز بطريقته، بس بالنسبالي شخصية فيبي بوفيه كانت مختلفة عن الكل (وبالنسبالنا كلنا الحقيقة)، عايشة في عالمها الخاص بقوانينها هي، وده خلاها عندها ردود فعل يا إما تخليك تضحك من قلبك، أو تستفزك ساعات.. وفي كل الأحوال شخصية فيبي ماتتنسيش، علشان كده اخترنا شوية مواقف وتصرفات "ممكن" نتعلمها منها.

دروس من شخصية فيبي بوفيه

فيبي شخصية غريبة ومجنونة بالنسبة لناس كتير لكن برضه ده مايمنعش إننا ممكن نتعلم منها حاجات كتير.. زي:

1-الصراحة هي أقصر طريق

via GIPHY

فيبي شخصية صريحة وصادقة وسهل عليها تقول لأ لأي حاجة مش حابة تكون فيها، بدل ما تخلق أعذار كتير.. وحتى لما بتحاول تتهرب كانت بتقول حاجات مش منطقية وبعدين تعترف إنها مش عايزة تعمل التصرف ده أيًا كان. صحيح ساعات صراحتها كانت بتعقد الأمور شوية، بس ده ماكنش بيستمر لأنها "الحقيقة".

اقرئي أيضًا: 7 دروس يمكننا تعلمها من علاقة مونيكا وتشاندلر في مسلسل فريندز

2-امشي ورا شغفك

مش مهم رأي الناس طالما أنت مبسوط ومش بتضر حد، ده اللي ممكن نتعلمه من فيبي لأنها دايمًا مؤمنة بنفسها وبشغفها وبتحققه بأي طريقة كانت، سواء إنها تغني في سنترال بيرك وتكتب أغانيها وتعزف أو تشتغل مدلكة.. المهم إنها مبسوطة.

3-الحيوانات = أصحاب

via GIPHY

فيبي نباتية لأنها مابتحبش تأذي الحيوانات، ودايمًا هتلاقيها متعلقة بكلب أو قطة ومعتبراهم أصدقائها. ده مش معناه إننا نكون نباتيين زيها، بس الفكرة نفسها، إنها رحيمة بكل المخلوقات حتى لو كانت بتعتقد في نظريات غريبة حبتين.

4-استمتع باللحظة

رغم إن فيبي عاشت طفولة قاسية جدًا، والدتها انتحرت وعاشت في صندوق في الشارع وماتعرفش والدها، لكنها احتفظت بطاقة إيجابية، وكانت حتى بتلاقي ذكريات حلوة عن طفولتها.. فيبي بتعيش كل لحظة للآخر وبتستمع بيها بكل تفاصيلها، ومابتخليش الماضي يوقفها.. وكمان مابتخفش من الماضي وبتتكلم عنه بكل صراحة وبتتعامل معاه.

اقرئي أيضًا: علامات تقول أن الكراش معجب بكِ

5-ثقتك بنفسك هي نقطة قوتك

via GIPHY

فيبي هي الشخصية الأكتر ثقة بنفسها في المسلسل كله، دايمًا عارفة هي عايزة إيه ومابتسمحش لحد يشكك فيها أو في قدراتها، دايمًا عارفة إنها جميلة وذكية حتى إنها ساعات بتاخد خطوات مش محسوبة ومابيهماش ردود أفعال اللي قدامها لأنها ببساطة عارفة نفسها. الثقة دي بتظهر في مواقف مختلفة كتير، بس واحدة من أهم المواقف لما كانت بتجري مع ريتشل، كانت مبسوطة بطريقتها الـ"غريبة" الممتعة، وده خلى ريتشل في النهاية تقلدها.

6-قدم المساعدة دايمًا

كل شخصيات "فريندز" كانوا أصدقاء جدعان، وبيساعدوا بعض كل واحد بطريقته، وفيبي كانت من أبرز الشخصيات اللي دايمًا بتحاول تساعد، فساعدت مونيكا في مشروع الـ"Catering" من قبل مايخططوا إنهم يتشاركوا فيه سوا، واتنازلت لريتشل علشان تكون Bridemaid لمونيكا لأنها حست إن ده بيعنيلها أكتر.. وفوق كل ده كانت الأم البديلة لولاد أخوها!

اقرئي أيضًا: 8 دروس في العلاقات ألهمتنا بها افلام هاري بوتر

7-اختار راحتك

via GIPHY

فيبي مش مهتمة بالـ mainstream أهم حاجة عندها تكون مرتاحة ويكون كل شيء بتعمله له معنى أو بشكل أوضح "تكون هي معتقدة إنه له معنى".. وده كان بيظهر في اختياراتها دايمًا، وحتى في لبسها كانت بتفضل الراحة على الموضة، ولبست بنطلون سانتا كلوز لما كانت حامل عادي جدًا.. ده مش معناه إننا نلبس أي حاجة، لكن طريقة التفكير نفسها مريحة.

ممكن تشوف فيبي مجنونة أو غريبة لكنها دايمًا عندها حاجة تقولها، شخصية خفيفة وعميقة في نفس الوقت، عندها تاريخ وحياة صعبة لكنها ماوقفتش عندها ودايمًا بتحاول تكون أحسن، بتتبسط بكل الحاجات الصغيرة، وبتسيب نفسها للتجارب علشان مابتخافش تخسر.. فيبي دمها خفيف وصاحبة جدعة، كن مثل فيبي بطريقتك.

اقرئي أيضًا:

ليه البنات بتفضل البادي بوي عن الجود بوي.. اعرفي الأسباب

أفضل المجاملات التي تحب النساء سماعها وكذلك أسوأها

10 علامات تخبرك أنه لا يحبك بل يريد امتلاكك