7 أسباب ليه بنحب عُمر في مسلسل بـ 100 وش

مسلسل بـ 100 وش من المسلسلات الرمضانية اللي حققت نسب مشاهدة وشهرة عالية السنة دي في رمضان. مش بس عشان القصة والأحداث اللي بتشدنا عشان نتابعها، ولا فريق العمل المُميز، بس عشان في خط رومانسي ظهر مؤخرا، وطبعا الخط ده بين عُمر وسكر أو شوجر زي ما كلنا بنسمعها من آسر ياسين. وبالرغم من أن عمر نصاب وسكر كمان نصابة، فكرت شوية احنا ليه ممكن نكون شايفين عمر الشاب المثالي للعلاقة العاطفية السوية؟ وعلاقته بسكر علاقة صحية جدا وجميلة لدرجة أن معظمنا بقى بيتابع المسلسل عشان يشوف هيعملوا ايه وهيقولوا ايه لبعض. وتوصلت للأسباب التالية اللي بتخلينا نحب شخصية عمر في 100 وش...

1- سلس، صريح، دوغري

شوفتوا قال لسكر بحبك ازاي؟ مافيش تحوير مافيش خطط مافيش داعي لأي كلاكيع والله. حس بحاجة قالها، بس كده بهذه البساطة والسلاسة والخطفة غير المتوقعة. ليه الناس مش زي عمر والله؟ ليه مافيش سلاسة في العلاقات كده؟ يلا معلش.

2- بيحب أمه، بس مش ابن أمه

العلاقة بين عمر ودرية الحقيقة تدرس في قاموس العلاقات العائلية. عمر قدر يحافظ على خيط رُفيع أوي بين أنه بيحب والدته جدا وهى حياته وبيعمل كل حاجة عشانها، وبين أنه في نفس الوقت الشخص أو الراجل اللي ممكن نسميه "ابن أمه" لأنه ببساطة مش بيمشي وراها وخلاص، بالرغم من أنه بيحبها ويحترمها.

بدليل أنها ماكنتش موافقة على سكر وهو حاول يقنعها من غير ما يزعلها ومن غير ما يتخلى عن سكر. شابوه عمر الجزار والله.

اقرئي أيضا: دروس في العلاقات اتعلمناها من فيلم You've Got Mail

3- مابيحاولش يغير سكر

سمعنا؟ فهمنا طيب؟ عمر حب سكر زي ما هى، ماحولش يغير فيها أي حاجة. بالرغم من اختلافهم عن بعض وأنها من ثقافة وخلفية مختلفة، إلا أنه حبها بجدعنتها وطيبتها والروح الشعبية اللي جواها. حتى لم قالها أنه بيحب الشعر الأحمر عليها، كانت جملة بسيطة سهلة وقالها بلاطفة، ولما غيرت لون شعرها الأحمر ماتخانقش معاها ولا حاجة وفضل يحبها عادي سبحان الله. وبالرغم من أنه كان بيتريق على الإنجليزي بتاع سكر في الأول وتصرفتها اللي غريبة عليه، بس ماحولش يغير أي حاجة في ده. فبرافو عمر والله.

مش بس كده ده كمان مابيحولش يسيطر عليها وبيتناقشوا مع بعض في كل حاجة. وكتير شوفنا عمر بيدعم سكر وبيحبها تنجح.

4- بيعمل كل حاجة عشان الناس اللي بيحبها

زي ما شوفنا خلال أحداث المسلسل، عمر بيعمل كل حاجة يقدر عليها عشان مامته، وعمل كل حاجة برضو عشان سكر تحبه. يعني مثلا عزمهم يوم خطوبتة نادية، فضل وراها لحد ما قالتله أنها بتحبه. عمر كمان بيحاول يساعد ماجي لما بتحتاجله ومابيتخلاش عنها. إحنا ليه ماعندناش عمر في حياتنا؟

اقرئي أيضا: 8 لحظات بسيطة لكن مهمة وملهمة في العلاقات العاطفية

5- علاقة عُمر بأزهار

مش عارفة هتفتكروا ولا لأ بس أزهار دي والدة سكر. والعلاقة الكوميدية اللي بتجمع عُمر بأزهار بتخلينا نحب فكرة الحماة، لما بنشوف قد ايه أزهار بتحب عُمر وبتتحيز له كتير يمكن أكتر من سكر بنتها. وقد ايه عُمر بيحبها برضو ومابيتكسفش منها بالرغم أنها مختلفة عن أمه وعن سيدات نادي الجزيرة، بس عمر بيحبها جدا وبيعتبرها زي مامته.

6- بيحب المفاجآت

عُمر فاجىء سكر وفاجأنا كلنا بكلمة بحبك البسيطة دي وقالها في موقف عادي جدا. وتاني مرة فاجأها برضو وراح طلب إيدها من أزهار في نادي الجزيرة بدون مقدمات. والحقيقة بدون أي انحياز يعني، إن الإنسان بيحتاج يتفاجىء والله، ولما المفاجأة بتبقى حلوة بتبقى سعادة مافيش بعد كده.

اقرئي أيضا: 7 حاجات ممكن نتعلمها من فيبي بوفيه في مسلسل فريندز

7- برنس كده في نفسه

بعيدا عن أن اللي بيقوم بشخصية عمر هو آسر ياسين اللي ليه معجبات كتير، لكن الفكرة في شخصية عُمر نفسها. عُمر دايما مهتم بنفسه ومحافظ على مظهره، وبيحب يعيش أحسن وطموح وعنده خطط للمستقبل. طبعا في أحداث المسلسل عمر بينفذ كل ده بطريقة غلط، لكن في الحياة العادية مهم أن شريك حياتك يبقى مهتم بنفسه وطموح.

بس بعد كل الكلام الجميل ده عن عُمر، هو في الآخر نصاب نركز بس. يعني لو قابلتي حد فيه كل الصفات دي ونصاب، اهربي بسرعة.

اقرئي أيضا: علاقات توكسيك ماينفعش نديها "فرصة تانية"

ونحب تاني ليه؟... 7 أسباب تخلينا نحب تاني

7 تصرفات ونقاشات لو حصلت مع شريكك اهربي

مصدر الصورة الرئيسية