جمل ابتعدي عنها أوقات دعم صديقتك بعد الانفصال

 بعد الانفصال بيكون فيه كمية كبيرة من المشاعر  اللي بتمر بيها صديقتك المقربة، والتعامل مع حالتها النفسية في الفترة دي بيكون أهم من إنكم تلاقوا حل للمشكلة نفسها، علشان كدة فيه جمل ماينفعش تقوليها لصاحبتك مهما كنتي شيفاها إنها جمل مهمة، ولا هتعبر عن نصيح ممكن تفيدها، لإن غالبا اللي هي هتكون محتاجاه هو السمع والاحتواء، فاعرفي إيه هي الجمل اللي ماينفعش تستخدميها فترة دعمك لصديقتك بعد انفصالها علشان ماتتحوليش لعبء إضافي عليها من غير ما تحسي.

"مش قلت لك!.. شوفتي لو كنتي سمعتي الكلام.. ياما حذرتك.. عيب عليكي أنا كنت عارفة إن ده هيحصل.. وغيرها من الجمل اللي بتحاولي فيها تثبتي إن وجهة نظرك في الشخص اللي كانت مرتبطة بيه صح".. لازم تعرفي إن حالات الدعم غير المسابقات، بمعنى إن دي م مساحة للانتصار لوجهة نظرك ولإثبات إنك كنتي فاهمة وشايفة الموضوع صح! في مليون طريقة ممكن تدعمي بيها صاحبتك غير إنك تلوميها على مشاعرها أو تعاقبيها عليها.

 كمان الجمل دي واللي ممكن تتفهم على إنها جمل "تَشَفي" ممكن تبني حاجز رهيب بينك وبين صاحبتك، وتخليها ممكن تلجأ لكل الحلول أو بدايل الدعم علشان ما تلجأش لكي تاني، مهم إننا نقف مع الناس اللي بنحبهم من غير ما نحسسهم هما قد إيه كانوا غلط وحساباتهم غلط، حتى لو كانت دي الحقيقة، اللوم على اللي فات مش بيولد غير مشاعر سلبية لصاحبه وماعتقدش إن ده اللي هتكون محتاجاه صاحبتك في وقت زي ده.

 

 

  اقرئي أيضًا: علاقات توكسيك ماينفعش نديها ”فرصة تانية”

"لازم تبطلي تكلميه.. لازم تقطعي خالص.. لازم تعملي كذا".. فيه أكتر من طريقة ممكن توجهي بيها صاحبتك في فترة ما بعد الانفصال، لإن الجمل الإلزامية دي بتحمل عليها التزامات هي هتكون في وقت أضعف من إنها تنفذها فهتحس بتقصير أكتر في حق نفسها أو ضعف أكبر هيزود من سوء حالتها وممكن كمان يحقق نتايج عكسية معاها  زي إنها تحاول الرجوع للشخص اللي كان في حياتها حتى لو كان مصدر أذى لمجرد إنها شايفة إن ده الحل البديل الوحد وإنها استحالة تقدر على تنفيذ الحاجات اللي طول الوقت بتنصحيها بيه.

 كتير من الأوقات بيكون الشخص فاهم كويس جدًا إييه اللي لازم يعمله، لكن طاقته مابتكونش عامل مساعدة قوي لإنه ينفذ ده، لكن الأمور بتكون واحة ليه، ومع ضغط المحيطين بيه، بيتكون عنده شعور سلبي بإنه شخ ضعيف وأعف من إنه ينصف نفسه! علشان كدة مهم إنك توجهي صاحبتك في الأوقات دي بالطريقة اللي تتناسب مع شخصيتها، بعيدًا عن الشكل الإلزامي.

جمل كتير بتتقال على سبيل الدعم في أوقات، لكن بتدي نتايج عكسية تمامًا، خصوصًا في فترات بعد الانفصال، ومن الجمل اللي لازم تتجنبيها تمامًا خلال مرحلة دعمك لصاحبتك ومساعدتها إنها تخرج من الحالة النفسية السيئة اللي هي فيها جمل زي "إيه اللي انتي عاملاه في نفسك ده.. الحقيقة أنا مش مصدقة إن كل اللي حاصل ده علشان فلان!.. بطلي أفورة، خليكي كدة وهو على باله".. إيه الفايدة بقى!  يعني بعد الجمل دي  ما تتقال هل خلاص صاحبتك هتقوم وتحارب الحياة بقى وتتخطى كل الأحزان! أكيد لا بس كل اللي هتحسه هو إنها مش قادر توصل ليكي حجم وجعها، ومش قادرة تعبر عن مشاعرها بقدر كافي يناسب حجم الأذى اللي هي حاسة بيه.

 كل شخص حقه يحدد حجم وجعه، ودي حاجة بتكون خاصة بيه هو مش خاص بحد تاني، لإن اللي إنتي ممكن تكوني شايفاه حاجة تافهة لحد، ممكن يكون بالنسبة له هو مركز الكون، فماينفعش نقيم وجع اللي حوالينا بمقاييسنا إحنا، وحاولي تتجنبي تمامًا جمل زي الجمل الي ممكن توصل لها شعور بإنك مش حاسة بيها أو مش مقدرة حزنها.

 

اقرئي أيضًا: 6 علامات تخبرك أنك في علاقة ”غير محددة”.. اعرفيها 

 

تخيلي كدة تبقي في أزمة كبيرة، وعندك كمية مشاعر سلبية تكفي تتوزع على كوكب الأرض، وتلاقي حد جاي بيحملك أسباب المشاعر السلبية اللي إنتي حاسة بيها، يعني مش بس هتبقي  حاسة باللي حساه، لكن كمان هتبقي إنتي سبب الأذى! هتقدري تكملي كلامك مع الشخص ده! أو حتى ممكن تحسي بإن المشاعر السلبية اللي جواكي قلت! كيد لا، وأكيد كمان محدش بيسعى إنه يضر نفسه.

علشان كدة أسوأ حاجة ممكن تقوليها لصاحبتك بعد الانفصال هو إنها كانت السسبب في اللي وصلت ليه، حتى لو كان ده صحيح، أوقات كتير لازم مانستخدمش الحقايق ضد صحابها، ومش كل حاجة صح ينفع تتقال أو على الأقل ماتتقالش في الوقت ده.

 

في النهاية دعم الصديق لصديقه أمر مهم، وكل حاجة مهما كانت سيئة بتهون بدعم المقربين، على عكس لو الشخص حس إنه لوحده بيمر بالأزمات لوحده، وبيعيش توابعها لوحده وبيحاول ينجو منها برضه لوحده، ده ممكن يزو مشاعر سلبية ويأثرفي الشخصيات بشكل سلبي، لكن وقفتك جنبك صاحبتك في أزماتها، بما فيها أزمات الانفصال ده بيكون عامل دعم ضرور، فماتتحوليش لمصدر سلبي أو عامل من عوامل زيادة المشاعر السلبية عن دون قصد، أوقات كتير بنأذي اللي بنحبهم بجمل بنكون معتقدين إننها بتساعدهم، فتجنبي تمامًا استخدام الجمل السابقة بعد انفصال صاحبتك وفي وقت دعمك ليها.   

 

اقرئي أيضًا:

 تأثير الاكتئاب على العلاقة الحميمة

في وقت العزل.. 6 نصائح تحافظ على علاقتك العاطفية 

إزاي تتجنبي الخلافات الزوجية في فترة العزل الصحي