10 علامات إنكم محتاجين كابلز ثيرابي (استشارة زوجية)

في أوقات العلاقة بينكم بتوصل فيها الخلافات وعدم القدرة على أنكم تفهموا وتستوعبوا بعض لدرجة سيئة، وبيكون الشعور السائد أنها النهاية وأنه الحل الوحيد أنكم تنفصلوا بشكل تام، لكن بيكون جواكم مشاعر تانية متناقضة رافضة التعامل مع السنين اللي ما بينكم والأيام اللي جمعتكم والتفاصيل اللي شاركتوها مع بعض بتساهل، أو بتستلموا لشكل العلاقة الفاتر وتعتبروه الوضع المناسب للوقت الحالي.

طبيعي تمر العلاقات بشكل عام بفترات من المد والجزر، أوقات لطيفة وسعيدة ومريحة، ومراحل من الملل والخلافات المستمرة والرغبة أنه كل حاجة تنتهي، ومن الممكن تكون فترات الغضب والاختلاف والفتور ما بينكم بدأت تكون هي السائدة على العلاقة، لكن ما زلتم بتتعاملوا معاها على اعتبار أنهم "يومين وهيعدوا".. مش دايما بيكونوا يومين، في أحيان بيكون الوضع بدأ ياخد أبعاد تانية ومحتاجة منكم تعامل مختلف.

الاستشارات الزوجية (الكابل ثيرابي)

كابلز ثيرابي

النقطة اللي بنوصل فيها لفقدان القدرة على التفاهم، وبيكون أبسط حوار صعب ينتهي من غير مشكلة وخناق على أتفه الأسباب، بنعتقد إننا خلاص مش هنكمل، وفي حالة أننا مش عاوزين ننفصل، بنفكر نعيش بالكل ده من غير تغيير، بعد ما تكون المحاولات نفدت والطاقة انتهت، رغم أنه ممكن يكون الحل إننا نلجأ لمتخصص يشوف العلاقة بطريقة مختلفة.

وقبل ما تقرروا تنهوا علاقتكم، اتأكدوا أنكم بس محتاجين تجددوا مشاعركم بطريقة مختلفة، وتتعاملوا مع المشكلات من منظور جديد، وبيحصل لو تتبعتم مجموعة من العلامات اللي بتوضح إنكم محتاجين couples therapy أو استشارة زوجية من متخصص، بدلا من الحياة الصعبة اللي بتعيشوها والتفاصيل اليومية الخانقة اللي تعانوا منها طول تواجدكم مع بعض.

هتقدروا من خلال الكابلز ثيرابي أنكم تعرفوا الأصل الحقيقي للمشكلة، والسبب اللى وصل علافتكم لشكلها الحالي، وكل واحد منكم هيفهم مشاعره بالغضب وعدم الرضا، وليه فقدتم الشغق تجاه بعض، وطافتكم لحل المشاكل والتعامل معها خلصت.. المهم أنكم تعتبروه طريقة فعالة مش مضيعة للوقت، وتلغوا فكرة أنه مجرد إجراء شكلي للتعامل مع نهاية محتمة.

اعتمدوا على الكابلز ثيرابي وامنحوه فرصة حقيقي في حال وجود تكرار الأمور دي ما بينكم:

1. انعدام التواصل

معروف أنه الصمت أو "الخرس الزوجي" واحد من الأمور اللي بتفسد العلاقة، لما يكون كل طرف متردد وفاقد للرغبة في أنه يتكلم ويشارك أفكاره ويعبر عن نفسه كأنه بيتجنب أي شكل من التواصل لمنع أي سوء تفاهم أو محاولة للنقاش والجدل، أو كأن الخوف هو اللي بيحكم العلاقة، فتبعدوا وتحاولوا تققلوا من فرص أي تعامل ما بينكم.

2. اهتزاز الثقة

أساس العلاقات الإنسانية الصحية بشكل عام هو الثقة، وفي العلاقة العاطفية والزوجية اهتزاز الثقة يعني خطر كبير بيهدد استمرارها، فأيا كان السبب المؤدي لغياب الثقة بينكم (سواء خيانة، الكذب المستمر، أو الإخفاء)، حتى في أبسط التعاملات والأمور اليومية العادية، معناه أنكم في حاجة لإعادة بناء الثقة من تاني، وتحاولوا تكتشفوا من خلال العلاج والاستشارات طريقة استعادة الثقة.

3. الجدال التافه المتوتر

via GIPHY

لما يتحول هدفكم من أي نقاش أو كلام عادي هو الصراع والخلاف، ده معناه انكم فقدتم القدرة على التفاهم، للدرجة أنه ممكن تستغلوا ساعات أو وقت طويل في جدل عقيم لا معنى له عن شيء مش مهم بالشكل الكافي، وكأنكم بتحاولوا تخبوا السبب الحقيقي بمناقشة مشكلات مش واقعية يا إما عن مكان ريموت التلفزيون، أو التكييف العالي. ونهاية الجدل غالبا بتكون صعبة بعد ما تسيئوا لبعض بكلام قاسي وسيء ومكنش.

4. التعامل كأعداء

بدأ الشعور بالغربة يتسلل لعلاقتكم، وكل فترة المسافة بينكم بتكبر وتزيد، وده بيؤدي في النهاية أنكم تكونوا شخصين غريبين تماما، وتفقدوا شعوركم بالأمان تجاه بعض، على العكس بتتغير المعاملة من الحب والثقة للعداوة الغريبة، خاصة، في أوقات الخلافات، وبيختفي شعوركم بالحرص على مشاعر بعض، وبيزيد استعدادكم لإيذاء بعض بكلمات قاسية من غير تردد أو ندم.

5. الاحتفاظ بالأسرار

أول ما تكونوا قادرين تحتفظول بالأسرار عن بعض، خاصة، في المعلومات المهمة واللي لازم تشاركوها مع بعض، فيبدأ كل طرف يكون حريص أنه التاني ميعرقش حسابه في البنك أو خططه في المستقبل أو حتى المشكلات اللي صادفها في يومه، وبيفضل كل واحد أنه بحتفظ بكل أموره لنفسه، وده مختلف تماما عن الخصوصية، الأسرار هنا في أمور المفترض أنها تشاركية بين الطرفين.

6. انعدام الراحة

السبب مش بيكون واضح، لكن في شعور غالب من الطرفين أو طرف واحد بعدم الراحة، وكأنه في حاجز اتبنى من غير ملاحظة حد، وتسرب الشعور بالغضب والضيق من العلاقة نفسها ومن أي شيء عنها، وبتحاول تتجنب التواجد في البيت أو مع شريكك، وفقدتم الحماس تجاه مشاركة أي شيء مع بعض.

7. أسباب مدمرة

في أوقات من الممكن تواجهوا مشكلات أكبر من قدرتكم على التعامل معاها، وبتعتقدوا في البداية أنه حبكم لبعض ممكن يكون كافي، وأنه هيساعدكم في التخطي والتجاوز، لكن أحيانا بتكون الصدمات أقوى وأشد، وبيكون ده في المشكلات اللي تشبه فقدان طفل، أو تعرض أي منكما لحالة فقد خاصة، أو بسبب وضع مادي صعب ناتج عن بطالة الزوج أو الزوجة لفترة طويلة، أو في حالات الأزمات الصحية الشديدة.. وده معناه ضرورة وجود متخصص يساعدكم على التعاون وفهم نفسكم من جديد.

8. اللوم على كل شيء

كل طرف بيعامل التاني على أنه سبب وأساس المشكلات، وتبدأ ما بينكم دوامة من اللوم المستمر على كل شيء، بداية من مكان المفاتيح وحتى الأمور الكبيرة من ضياع أموال أو غيره، وده بيكون نابع من رغبة كل طرف في انه يقنع نفسه ويقنع شريكه كمان أنه مش مسئول عن الوضع الحالي اللي بيعيشوه، وكأنه عاوز يخلي مسئوليته تماما، ويعتبر نفسه بلا أخطاء.

9. الاستسلام

في لحظة بيوصل فيها الشريكين لقناعة أنهم جربوا كل الحلول، وأنه علاقتهم أصبحت فاشلة، وبيقرروا الاستسلام، رغم أنه غير صحيح. بيكون وقتها الإرهاق هو المسيطر على مشاعرهم بعد ما يكونوا خلصوا طاقاتهم في المحاولات، سواء من خلال سفرية جديدة في مكان مختلف، أو عشاء لطيف في مطعم رومانسي، وجربوا كمان البريك، وكل ده مكنش له التأثير القوي ومعرفوش ينعشوا علاقتهم من تاني ويفهموا الخلل فين.. وده بيوضح حاجتهم لشخص متخصص يدلهم على الطريقة اللي يتعاملوا بيها مع مشكلاتهم عشان يعرفوها.

10. فقدان الحميمية

العلاقة بينكم أصبحت جافة وصعبة، فالتلامس بقى أقل أو غير موجود، وفقدتم الحميمية ما بينكم، ودي واحدة من أهم الأمور اللي بتزيد صعوبة الوضع وبتبعد المسافات ما بينكم، وبتساعد على القسوة والجفاء أكتر، ومحاولات أي منكم لاستعادة الأجواء دي من تاني، من الممكن أنها تواجه برفض أو عدم رغبة من الطرف التاني، وبيكون عواقب ده أشد.. وهنا المساعدة والثيرابي ضروري.

الاستشارة والثيرابي هيساعدكم ويكون مفيد في استعادة التواصل من تاني، وفهم أساس المشكلة، والتعامل مع الاختلافات والتغيرات اللي طرأت على حياتكم وعلاقتكم، مفيش داعي للتردد والمحاولة مع وجود علامات بتقول إن علاقتكم محتاجة مساعدة متخصصة.