ليه لازم نمشي من أي علاقة رمادية ومالهاش مُسمى واضح؟

حب ولا صداقة ولا انتوا شخصيات عابرة في حياة بعض؟ عدم معرفة إجابة السؤال ده يُعتبر تعريف واضح للعلاقات الرمادية أو العلاقات اللي أطرافها مش قادرين يحددوا إذا بالفعل في علاقة عاطفية أو لأ. مافيش خطوات واضحة، ولا حد بيصرح بمشاعره وفي نفس الوقت مش بيبعدوا عن بعض. والنوع ده من العلاقات بيبقى ضاغط جدا على الطرفين، وممكن يؤدي في وقت أنهم يسيبوا بعض ويخسروا صداقتهم أو علاقتهم الكويسة بسبب عدم مواجهة حقيقة العلاقة بينهم. وعشان كده لازم نتكلم عن أضرار المنطقة الرمادية بين أي اتنين وازاي يقدروا يهربوا منها بأقل خساير.

أضرار المنطقة الرمادية في أي علاقة عاطفية

1- مافيش مستقبل واضح لأي طرف

العلاقات العاطفية اللي مش واضحة ومالهاش مُسمى مُحدد بتأثر على مستقبل الطرفين فيها، لأن كل حد فيهم مابيقدرش ياخد أي خطوة في علاقة عاطفية حقيقية مع حد تاني، وفي نفس الوقت ماحدش فيهم يقدر يقول أنه في علاقة عاطفية حقيقية في الوقت الحالي مع الشخص التاني.

2- تأجيل مواجهة المشكلة

لما العلاقة ماتكونش واضحة بين طرفين وليها مُسمى تاني زي الصداقة أو المعرفة أو أي حاجة غير الحب، ساعات كتير كل حد فيهم بيخاف يصارح نفسه أو يصارح الطرف التاني بالمشكلة عشان مايخسروش. والتأجيل ده بيكبر فكرة الخوف من أن لو واجهت المشكلة ممكن الطرف التاني مايبقاش موجود بنفس الشكل أو العلاقة اللي موجودة حاليا بينكم تختفي.

3- تضييع الوقت في اللا شىء

العلاقات اللي مش واضحة بتضيع وقتنا على الفاضي لأن العلاقة مش رايحة أي حتة ومافيش أي حاجة أكيدة. وده بيخلينا بعض فترة نحس بالملل ونبدأ نسأل احنا رايحين فين وايه الهدف من استمرار العلاقة دي.

4- استهلاك للطاقة والمشاعر

أي علاقة عاطفية بتاخد من طاقة أطرافها ومشاعرهم حتى لو هم الاتنين ماقلوش ده لبعض. بس كل واحد فيهم طالما مشدود للتاني بشكل أو بآخر ف ده معناه ان في مشاعر حتى لو بدون قصد. عشان كده ماينفعش نطول في العلاقات اللي من النوع ده عشان ده بيأثر نفسيا علينا.

5- التفكير الزائد في العلاقة

في ناس كتير بتعاني في العموم من موضوع الأوفر ثينكينج، لكن النوع ده من العلاقات العاطفية اللي مش واضحة بيخلينا نفكر أكتر ونسأل أسئلة وجودية كتير. كل تصرف من الشخص التاني ممكن يتفسر كذا تفسير، وطبعا مانقدرش نتكلم أو نلمح عشان ماحدش قايل أي حاجة. كل ده بيخلينا نحس بمشاعر سلبية كتير وساعات بالشك في نفسنا.

ازاي نتعامل مع علاقة رمادية مالهاش ملامح؟

1- ناخد بالنا من العلامات

في علامات كتير بتقول أنك في علاقة رمادية، وبتبقى واضحة وصريحة وماينفعش تعمل نفسك مش واخد بالك. يعني مثلا ماينفعش تغيروا على بعض، وبتقدموا بعض للناس على إنكوا صحاب، وإلخ.

2- المواجهة هى الحل

في الحالات دي لازم نواجه، نعترف بمشاعرنا بدون تردد لأن أقصر طريق هو الخط المستقيم، والصراحة هى اللي هتوفر كتير من الطاقة والجُهد والمشاعر اللي ممكن تضيع لوقت طويل في علاقة مُبهمة.

3- نبعد عن الخوف

الخوف من فقدان الشخص الآخر ممكن يخلينا نفضل نأجل قرار المواجهة، ونعمل نفسنا مش واخدين بالنا. عشان كده لازم نفكر كويس قبل ما نتكلم ونبقى مستعدين لأي رد فعل.

4- نهرب؟

مش شرط إن المواجهة أو الكلام بوضوح يبقى نتيجته هروب لو مافيش استجابة من الطرف التاني، لكن ممكن يبقى في صداقة بس بمعنى صداقة. المهم أن العلاقة تبقى واضحة ومافيش حد مخبي مشاعره عشان خايف.

5- سرعة القرار

قرار الكلام بوضوح لازم مايبقاش متأخر، لازم نحدد بسرعة طبيعة مشاعرنا عشان لو مافيش مشاعر متبادلة مانبقاش ضيعنا طاقتنا ع الفاضي.

اقرئي أيضا: