10 حاجات بنحبها في علاقة أحمد حلمي ومنى زكي

في نفس اليوم من كل سنة وتحديدا يوم 18 نوفمبر بيحتفل النجمان أحمد حلمي ومنى زكي بعيد ميلادهم. قصة حب أحمد ومنى بدأت مع بداية الألفينات، ومع صعودهما كنجمين في عالم الفن. ويمكن ده اللي خلاهم من أشهر قصص الحب بالنسبة لجيل الألفينات لأنهم كبروا معانا وعرفناهم من بدايتهم. لكن بعيدا عن كل ده، في حاجات تانية كتير ممكن نتعلمها من قصة حب أحمد ومنى اللي ناس كتير بتحبها ومرتبطة بيها ومنها...

1- التقدير والاحترام المتبادل

في كل لقاء بيطلع فيه أحمد حلمي بيتكلم عن منى زكي بمنتهى التقدير والاحترام وبيعبر عن مدى امتنانه لزواجه منها. ونفس الحاجة هى بتعملها في كل فرصة بتسمحلها تتكلم عنه. الاتنين في بينهم علاقة مبنية على أساس الاحترام وكل واحد فيهم بيقدر التاني جدا وبيعترف بقيمته في حياته. وده اللي لازم نتعلمه من العلاقات العاطفية السوية والصحية.

2- التتشجيع وعدم وجود غيرة مهنية

بالرغم إن أحمد ومنى الاتنين بيشتغلوا في نفس المجال، إلا إنهم مابيغروش من بعض. بالعكس أحمد دايما بيشجع منى في كل خطوة وبيهنيها على الملأ بكل نجاح بتنجحه، وكتير شوفناه معاها واقف جنبها وبيشجعها لما بتحصل على تكريم أو بينزلها فيلم جديد. نفس الحكاية منى بتعملها مع حلمي وبتشجعه في أي حاجة سواء فيلم جديد أو برنامج أو كتاب، ودايما بتعبر عن فخرها بيه. والحقيقة أنهم نموذج لأي زوجين بيشتغلوا في نفس المجال بدون ما الغيرة تشوه علاقتهم.

3- مابيسمعوش لكلام الناس

أحمد ومنى من أكتر الكابلز اللي طلع عليهم إشاعات في الوسط الفني ولسه بيطلع عليهم. بس بالرغم من كده هم بيركزوا على شغلهم وعلاقتهم ومابيسمعوش لحد. مش بس كده هم كمان بيحاولوا يردوا بأفعال إيجابية سواء بشغلهم أو بالأنشطة اللي بيشاركوا فيها.

4- مابينشروش تفاصيل حياتهم على السوشيال ميديا

بالرغم إن أحمد ومنى شخصيات مشهورة وليهم جمهورهم، إلا أنهم حريصين جدا على عدم نشر خصوصياتهم وتفاصيل حياتهم الدقيقة وحتى صور أطفالهم الصغيرين على السوشيال ميديا أو في الإعلام عموما. صحيح إن أحمد حلمي بيشارك جمهوره بفيديوهات طريفة من حين لآخر، لكن بشكل عام بيحرصوا على الخصوصية. وده مابينمعنش منى وأحمد يعبروا عن حبهم لبعض بطريقة رومانسية بسيطة لما بيبقى في مناسبة تسمح بده زي عيد جوازهم أو عيد ميلادهم أو أي مناسبة تانية.

5- كل واحد فيهم عنده هوايات

ناس كتير بتفتكر إن الجواز والارتباط نهاية لأي هواية أو نجاح شخصي، لكن منى وأحمد أثبتوا العكس. فأحمد عنده هوايات تانية غير التمثيل اللي هو شغله الأساسي زي الكتابة لدرجة إنه نشر كتاب اسمه "18 حرف" وكمان بيحب الرسم وبيربي كلاب. منى كمان عندها أنشطة وحياة تانية غير البيت وشغلها زي كونها سفيرة النوايا الحسنة مع اليونيسيف. وكل واحد فيهم بيشجع التاني على النجاح في هواياته.

أحمد حلمي ومنى زكي

6- قصة حبهم ماكنتش سهلة

في الوقت اللي بنشوف فيه كابلز بيحبوا بعض ويتجوزوا في يومين، أحمد حلمي ومنى زكي قصة حبهم كانت مليانة صعوبات على قد ما كان فيها رومانسية. أحمد حكى كتير عن ازاي بدأت علاقته بمنى وقال إنه كن معجب بيها كممثلة وبعدين اتحول الموضوع لحب. وفي الوقت ده أحمد ماكنش نجم كبير في حين إن منى كان بدأ نجمها يلمع في السينما والدراما. مع ذلك أحمد حقق حلمه بأنه يتجوزها وقدر يعمل كل المطلوب منه عشان الجوازة تتم وعشان كان في اتفاق بينهم غير مُعلن على المودة والحب، القصة استمرت لحد النهاردة لأن الاتنين أخدوا وقتهم عشان يختاروا بعض وخدوا القرار بناءا على اختيار العقل والقلب.

7- بيحافظوا على هوية تربية أولادهم

منى زكي وأحمد حلمي عندهم 3 أبناء، الكبيرة لي لي وإخواتها سليم والأخير يونس. ودايما أحمد ومنى بيصرحوا إنهم بيحاولوا يربوا أبنائهم على القيم والهوية المصرية والعربية. يعني بالرغم من أن تعليم أبنائهم ألماني إلا أنهم بيحرصوا جدا على الاهتمام باللغة العربية، وأحمد حلمي صرح أنه بيحرص أن أبنائها يسمعوا القرآن باستمرار زي ما هو اتعود وهو صغير. كمان منى قالت أنها بتعلمهم يشيلوا حاجتهم بعد اللعب ويحطوا كل حاجة في مكانها.

8- نجاحهم مابيأثرش على حياتهم العائلية

بالرغم من مشغوليات الاتنين ونجاحهم المهني، إلا أن أحمد ومنى بيحرصوا أن أكتر الوقت يقضوه مع أسرتهم وبيهتموا بتربية أطفالهم بنفسهم، ودايما عندهم حب لفكرة البيت والعيلة، وده شوفناه كتير في فيديوهات شاركها أحمد حلمي مع جمهوره خصوصا وقت الحظر.

9- بيساعدوا بعض في الشغل والبيت

أكتر من مرة حلمي ومنى صرحوا بأن كل واحد فيهم بيساعد التاني في شغله، زي في فيلم عسل أسود لما حلمي خد رأي منى ونبهته إن اللهجة الأمريكاني مش مظبوطة في الفيلم وده خلى حلمي يعمل دوبلاج للفيلم كله. منى كمان بتصرح كتير قد ايه حلمي بيساعدها مش بس في شغلها وتشجيعه ليها، لكن كمان في البيت زي أنه بيساعدها في رعاية الأبناء لأنها مسئولية مشتركة بينهم خصوصا لما هى بيبقى عندها شغل.

10- متقبلين شخصيات بعض

بملاحظة بسيطة نقدر نعرف الاختلاف اللي بين شخصية منى وشخصية حلمي. مش بس ملاحظة، هم نفسهم كتير بيقولوا على الموضوع ده وانهم مختلفين في عاداتهم في البيت أو في شخصية كل واحد فيهم. لكن ده ماأثرش على علاقتهم أبدا وكل واحد فيهم متقبل الآخر زي ما هو ومابيحولش يتحكم فيه.

عشان كل الحاجات دي وأكتر احنا بنحب الكابل أحمد حلمي ومنى زكي اللي كبروا معانا وشوفنا كل مراحل حياتهم...