8 اختلافات بينكم مينفعش تخلي العلاقة تستمر

المحتوى:

1- أفكاركم عن شكل العلاقة نفسها

2- الأطفال

3- قيم أساسية

4- نظرتكم للفلوس

5- شايفين المستقبل إزاي

6- الاعتقاد الديني

7- خطين متوازيان

8- اهتمامات الطرف التاني مزعجة

الاختلاف بين الأشخاص هو الشيء الطبيعي في التواصل بين البشر، وفي العلاقات الإنسانية بشكل عام وكذلك العلاقلات العاطفية بيكون اختلافنا عن بعض هو اللي بيعرفنا على حاجة جديدة وبيخلينا نكتسب مهارة أو فكرة أعمق عن الحياة، لكن أوقات بيكون في اختلافات من الصعب التعامل معاها، خاصة لأنها بتكون في أساس الشخصية وبتخلي التواصل منعدم وكل طرف مش قادر يفهم التاني.

لما بنختار شريك حياتنا كل حد فينا بيدور على حاجة، في أشخاص بيسعدهم يكونوا هما وشركاؤهم متشابهين في أغلب الأمور، وفي كابلز بيعتبروا أن اختلافاتهم الشديدة هي اللي بتكسر الملل وتجدد العلاقة دايما، وأكيد كلنا بنفرح لما نلاقي أن فيه اهتمامات مشتركة بيننا وبين الطرف التاني، لكن فيه نوع من الاختلافات بين الطرفين وجوده بيقول أنه في مشكلة.

الاختلافات اللي اخترناها تعتبر علامات أنه صعب العلاقة بينكم تستمر، وأنه الموضوع مش مجرد هوايات واهتمامات لكنه أعمق بكتير، عشان كده الاستمرار في العلاقة هيبقى إنهاك نفسي ليكم ومضيعة للوقت، لأنه المصير في النهاية محتوم بالفراق- في الغالب-.

1. أفكاركم عن شكل العلاقة نفسها

لو كنتم في علاقة عاطفية مع بعض، وكل حد فيكم بدأ يصرح للتاني بمشاعره وكان فعلا في حب كبير بيحمل كل طرف للتاني، ممكن يدور تساؤل عن الخطوة اللي بعد كده ودي أهم نقطة بيكون الاختلاف فيها هو النهاية، يعني لو أي طرف شايف مستقبل العلاقة بصورة مختلفة تماما عن التاني ده بيفسد الحب اللي بينكم.

في طرف ممكن يفضل شكل العلاقة زي ما هو اتنين بيحبوا بعض وموجودين جنب بعض تحت أي مسمى "مرتبطين، متصاحبين.." من غير أي قيود أو مستقبل، في حين الطرف التاني متوقع شكل مستقر أكتر ومستقبل أبعد زي الجواز وأنهم يعيشوا مع بعض باقي العمر، والاختلاف في النقطة دي معناه تعاسة دايمة ملهاش حل.

2. الأطفال؟!!

via GIPHY

ده موضوع كل طرفين لازم يتناقشوا فيه قبل الخطوة الجدية للعلاقة وهي الجواز، لأنه الاختلاف حوالين وجود أطفال من عدمه جوهري ولازم تحسموه قبلها، لأنه إذا كان في طرف عنده خطط يكون عنده أطفال والتاني مش عاوز ده هيكون محبط وبيسبب أذى نفسي كبير للطرفين

ومع تخطي الاتفاق بوجود أطفال، لازم على الأقل تكونوا متفقين على طريقة التربية، وهل هتنجبوهم؟ ولا ممكن تلجأوا للتبني، وده لتجنب خلافات كتيرة مش سعيدة إطلاقا، ولأن جلب طفل جديد للعالم مسئولية مش سلة ومحتاجة تخطيط ووفاق.

3. قيم أساسية

الموضوع هنا له علاقة بأسلوب وشكل حياة كل واحد فيكم، معايير الصح والغلط والعيب أو المعايير الأخلاقية اللي بتحكم كل واحد فيكم، وطريقة تعامله مع اللي حواليه ونوع أصحابه وعلاقته بيهم، والحدود اللي حاططها لنفسه، وكذلك تقديره للتصرف الكويس أو السيء، وحتى طريقة اللبس.

لأن لو في طرف بيشوف أنه ممكن يكدب لو عاوز يوصل لحاجة معينة سواء منصب في شغل أو حتى خدمة من واحد من أصحابه، والتاني بيعتبر ده مش مقبول ومرفوض الخلاف هيكون كبير وصعب يمر، لأنه بينعكس على جوهر شخصية كل طرف اللي صعب يتغير مهما كان الحب كبير. (ومش هدفنا نقيّم الاخلاقيات، لكن على الأقل يكون الأشخاص على نفس مستوى القيم الأساسية في الحياة).

4. نظرتكم للفلوس

الاختلاف هنا مش هيكون سهل التعامل معاه أبدا، مهما اعتقدنا أن لو كل واحد ليه استقلال مادي ده مش هيأثر، على العكس هتفضل تعليقات كل طرف على التاني في الأمور المادية مزعجة والفلوس هتكون سبب في توتر العلاقة، عشان كده مينفعش العلاقة تستمر بين طرفين، واحد فيهم بيشوف الفلوس وسيلة يجيب بيها كل اللي يحبه ويسعده من غير حساب، والتاني بيحب الفلوس نفسها وبيهتم بالادخار وممكن يتوصف بـ "البخل"، لأنه مصدر سعادة كل واحد فيهم مختلف تماما، ومن الصعب التوافق عليه.

5. شايفين المستقبل إزاي

بعيدا عن مستقبل علاقاتكم- اللي وضحناه قبل كده- لكن المقصود نظرة كل طرف لمستقبله الشخصي، فإذا كان في طرف عنده طموحات في أنه يهاجر بره بلده ويكمل حياته في مكان مختلف، والتاني سعيد بوجوده في بلده ومعندوش استعداد يسيب أصحابه وأسرته، هيكون صعب يكملوا مع بعض لأن ده معناه تعاسة للطرف التاني أيا كان هو مين، عشان كده من الأفضل تكون الطموحات بتتلاقى بشكل ما، أو مش بتأثر على أي طرف بطريقة سلبية.

6. الاعتقاد الديني

المسألة مش بس أنكم تكونوا من دين واحد، فتعتقدوا أنه ده يمنع الاختلاف، لكن أنه يكون عندكم وجهة نظر قريبة من بغض للدين والتدين (بغض النظر عن الديانة نفسها)، عشان هيكون صعب ومؤسف لو في شخص متدين والتاني مش مصدق في الفكرة أصلا.. فاتكلموا الاول أفضل.

7. خطين متوازيان

اختلافات في العلاقات

عارفين كلنا اللحظة السيئة اللي بنقول فيها إفيه أو جملة مشهورة من فيلم، ونلاقي الطرف التاني مش فاهم إحنا بنقول إيه، ده بقى مثال بسيط لأنكم متكونوش على نفس الخط، كل واحد بيغرد في سرب مختلف تماما عن التاني، والموضوع مش بيكون بس اهتمامات مختلفة لكن أنه يكون في شخص بيبص للسما يفرح بشكل القمر، والتاني مش بيرفع وشه عن الأرض أصلا أو بيعتبر التصرف ده سذاجة.

8. اهتمامات الطرف التاني مزعجة

بالتأكيد، مش هيكون كلنا عندنا نفس الميول، وأوقات كتير بنقدر اهتمامات الطرف التاني لأننا بنحبه، لكن لما تتحول نظرتنا للاهتمامات دي لنظرة ضيق وانزعاج هيكون الاستمرار مرهق وسخيف، زي ما طرف يكون بيحب تربية الحيوانات والتاني بيخاف منها وبينزعج من وجودها، ده اختلاف مينفعش التعامل معاه.

الاختلافات اللي بتأثر على استمرار العلاقات العاطفية كتيرة وبتتغير من شخص للتاني.. اكتبوا لنا في التعليقات عن الاختلافات اللي مش ممكن تقبلوها.