تعملي إيه عشان "تخلعي" من هدية الفلانتين؟


عدد المشاهدات : 1274
تاريخ الخبر : 12-2-2018 

بواسطة

ايمان منير

مش معاكي فلوس، وعاوزة تخلعي من هدية الفلانتين، بس بشياكة، مش عاوزاه يمسك عليكي غلطة، تعالي اعرفي معانا إزاي تعملي كده؟

 

ألفي حكاية تاريخية عن الفلانتين والاحداث المأساوية اللي حصلت فيه وقوليله نصًا كده "أنا كان نفسي أجيبلك هدية بس خايفة عليك يا حبيبي".

اعملي نفسك زعلانة ومكتئبة قبل الفلانتين بيومين، وقوليله عاوزة أبقى لوحدي اليومين دول لحد ما الفلانتين يعدي، وارجعيله بعده بأسبوع ولا حاجة.

فركشي معاه قبل الفلانتين بأسبوع، وهو طبعًا هيحاول يرجعلك، أنتي خليكي ثابتة على موقفك لحد ما الفلانتين وأجواءه تعدي، وبعدين ابقي ارجعي يا بنتي، إحنا مش بنلاقي الفلوس.

خليكي شيخة يوم الفلانتين، وامسكي في جملة "الفلانتين حرام"، عاوزين تدخلونا النار ولا إيه.

احكيله عن أصحابك البنات ومصير الهدايا وكمان مصير حبايبهم في اليوم ده، ومفيش مانع تشغلي خيالك شوية وتألفي حكايات، قوليله صاحبتي كذا لما جابت تيشرت جديد لحبيبها في الفلانتين وقع على ضهره اتكسر، وأنا خايفة عليك مش أكتر.

قوليله إن الفلانتين ده بتاع العيال الصغيرة وإحنا كبار يا حبيبي، وأيامنا كلها فلانتين.

سافري قبل الفلانتين، وارجعي بعدها بفترة يكون الموضوع اتنسى.

 اقفلي الموبايل فترة الفلانتين، وافتحيه بعدها وقوليله، إنه كان محتاج يتصلح، وهو طبيعي هينسى الهدية واقعدي اتفرجي على اللي هيحصل بقا.

اعملي نفسك تعبانة ومبتخرجيش من البيت لحد ما اليومين دول يعدوا.





الأكثر مشاهدة

خمس حواس