7 أكلات بتدفي المصريين في الشتا

الأكل متعة اتفق عليها البشر، هو جزء من ثقافة الشعوب، لما تحب تعرف شعب كويس شوف أكله.. وإحنا في مصر أساتذة في المطبخ، وفي الشتا بتبقى في أكلات مسجلة باسم الفترة دي لأنها بتزود الدفا.. وميزة الأكلات المصرية الشتوية إن كتير منها موجود في الشارع وعلى القهاوي وفي المحلات، هتلاقيها في كل حتة وبأسعار بسيطة.. الدفا متوفر في شتا مصر وعليك الصحبة الحلوة.. شوفوا القايمة:

1-شوربة العدس

ماينفعش ماتجيش على رأس القائمة، شوربة العدس أكلة بيقول عنها المصريين بالبلدي "بترم العضم" ولونها الأصفر أو البرتقالي لوحده بيدفي.. العدس مصدر للبروتين النباتي والألياف وكمان فيه أملاح معدنية زي الصوديوم والبوتاسيوم.

2-البليلة

وجبة خفيفة بتدفي وبتدي شعور طويل بالشبع، وبينصح بيها دكاترة الريجيم كفطار، حبوب قمح مسلوق مع اللبن والفانيلا والسكر، في ناس بتضيف معاها تمر أو مكسرات ورشة قرفة.. تشكيلة اللبن والقمح غنية بفيتامينات زي ب1، ب2، ب6، الكالسيوم، الحديد، البوتاسيوم، والألياف ، ونسب من الفسفور والزنك والمغنسيوم.

3-البطاطا

عربيات البطاطا في كل مكان في مصر كأنها رمز ثقافي كده، البطاطا مصدر للبهجة المسكرة، وبقى موجود عربيات بطاطا بتزود صوصات مختلفة زي الكراميلا والنوتيلا.. البطاطا مصدر مهم لفيتامين سي وفيتامين أ وفيتامين ب6، والكربوهيدرات.

4- حمص الشام "الحلبسة"

 هتلاقي عربيات حمص الشام موجودة على النيل خصوصًا.. هو مشروب أكتر منه أكلة، لكنه في كل الحالات بيدفي جدًا، والشطة بتاعته بتقلل من لسعة البرد في شوارع القاهرة بالليل.. الحمص مليان بروتين، وخليط من المعادن زي الكبريت والبوتاسيوم والفسفور والحديد والكالسيوم.

5- الكشك

أكلة شتوية بامتياز، لها كذا طريقة لعملها في صعيد مصر والدلتا، وفي كل الأحوال بتدفي جدًا، بسبب خلطة الدقيق/البرغل مع الشوربة واللبن الرايب أو الزبادي وباقي المكونات.. خليط المكونات ده بيجمع فوائد كتير زي البروتين وخمائر الزبادي اللي بتساعد على الهضم مع الأملاح المعدنية مثل الصوديوم والكالسيوم.

6- القلقاس

الأكلة الأكتر عرضة للسخرية في مواقع التواصل الاجتماعي، لكن الأمهات بتحبها وبتعملها.. بس بعيدًا عن السخرية القلقاس أكلة مصرية شتوية لذيذة، والأسطورة بتقول إنه بيبقى أحلى لما الدنيا تشتي عليه لأنه بيبقى أطرى في الأكل.. القلقاس بيحتوي على كربوهيدرات وفيتامين سي وفيتامين د والبروتين والكالسيوم.

7- السحلب

المشروب الرسمي للشتا، وممكن يتعمل أتقل ويبقى مهلبية سخنة، هتلاقيه في كل البيوت المصرية في الشتا، وفي القهاوي أكيد.. هو خليط من اللبن والنشا والمكسرات مع السكر والفانيلا والقرفة وجوز الهند.. في الأصل السحلب مسحوق السحلب بيطلع من نبتة من فصيلة "السحلبيات" موجودة في إيران وأفغانستان واليونان.. السحلب بيمد بالبروتين والكالسيوم ومجموعة من الأملاح المعدنية وفيه نسبة عالية من السكر.