أكلات بندفن أحزاننا فيها

الأكل متعة خالصة في كل وقت.. دايمًا موجود في أي وقت هتطلبه فيه، وبشوية فلوس زادت أو قلت هتلاقيه موجود، عمرك ما هتطلب ساندوتش شاورما فيقولك معلش مش فاضي. الأكل تجربة جميلة، في ناس بتروحلها في أوقات الزعل الشديدة علشان انبساط الأكل يغطي على حزنهم، وده وإن كان شيء حاجة حلوة إلا إنه متعة قصيرة، ولو زودتي هتتخني وتزعلي أكتر.. كلي اللي بتحبيه بس ماتزوديهاش.. لما سألنا البنات كان في إجابات زي "المخلل"، واللجوء لأحضان "الجيلي كولا"، و"الحلاوة الطحينية".. لكننا عملنا قايمة من أشهر الأكلات عند البنات واللي حضرت فيها الشوكولاتة السايحة والجبنة بشكل قوي.. اعرفوا القايمة..

1-البيتزا

مين مابيحبش الحلوة، هدية الإيطاليين للعالم.. مزيج من أكتر المكونات اللي بتحبها على حسب ذوقك مع الجبنة السايحة.. ممتازة للتعافي من العلاقات الفاشلة.. وفي منها نسخة حلوة بالنوتيلا وأنواع الشوكولاتة المختلفة، لا ينصح بها أطباء القلب والسكر.

2-المحشي

مفضل بالنسبة للأكيلة محترفين الأكل البيتي، وخصوصًا محشي ورق العنب المرصوص واحدة بواحدة وجنبه سلطة زبادي، المزيج ده بيحسسك إن الدنيا مليانة حاجات حلوة لازم تكمل علشانها.

3-البطاطس المحمرة

لو الترتيب في القايمة بالأهم كانت هتبقى في المركز الأول، البطاطس بيحبها الناس في كل الأعمار والأوقات، ووجودها الدائم جنب الأكلات الحلوة بيخليها رفيق للحظات السعيدة فبتكون جديرة تبقى وجبة لوحدها لحظة الحزن.. البطاطس هي الصاحب الجدع اللي بيشاركك كل أوقاتك، هتلاقيها في الفطار والغدا والعشا وبينهم.

4- الشوكولاتة

في هاشتاج #حاجات_بتفرح_البنات على تويتر كانت الشوكولاتة موجودة في أغلب التغريدات.. الشوكولاتة بتحسن المزاج لأنها مسكرة وفيها نسبة من الكافيين اللي بيحارب الاجهاد والاكتئاب، وفي أبحاث كتير بتدرس تحسينها للمزاج.. الشوكولاتة أيقونة السعادة عند عدد كبير من البشر.

5-الشاورما

ونخص بالذكر السوري منها، وبصحبة الساندويتش طبق التومية العظيم وصوت الشيف السوري بيقولك صحة وهنا..
لما سألنا عن الشاورما كانت الإجابة "ما يفسده العالم تصلحه الشاورما السوري".

6- المكرونة

أنواع المكرونة كتير، وصلصاتها مختلفة وملونة، بس الإجابات الأكتر كانت ناحية الصوص الأبيض مع كتير من الجبنة السايحة، والمكرونة بالبشاميل.. واحد من التعليقات على حب المكرونة كان "بحس إني بغوص في السعادة أول ما بحط الشوكة في الطبق".

قولولنا أكلتكم المفضلة في الأوقات الحزينة..