”مش وَحش”.. أسباب تخليكي مبسوطة بسن الثلاثين

بنات كتير بتخاف من سن الثلاثين، وكل ما تكبر وتزيد عشريناتها سنة.. قلقها يزيد، خصوصًا لو لسه "سنجل"، لأن المجتمع بيبدأ يصنفها بإن فرصها أقل في الارتباط لأن جمالها بيبدأ يقل في اعتباراتهم.. لكن ده مش حقيقي، سن الثلاثينات هو أفضل سن للمرأة، للأسباب دي:

• أنوثتك في قمتها.. جمالك بيزيد في الثلاثينات، وبتكوني حددتي شخصيتك الجمالية، ونمط لبسك وطريقتك في التعبير عن ذاتك، مابتجريش ورا الموضة زي العشرينات وبقيتي عارفة إيه بيليق بيكي أكتر.
  
• بالغة راشدة.. في مجتمعنا مابيعتبروش سن الـ21 وقت مناسب لاستقلال البنت، لكن سن الثلاثين هو الوقت الأمثل إن الأهل يفهموا إنك كبرتي وتستحقي تختاري حياتك.
  
  
• شابة بس مش طايشة.. في الثلاثينات إنتي شابة لسه وعندك طاقة تعملي حاجات كتير لكن في نفس الوقت اكتسبتي خبرة أكتر في الحياة وبقيتي أعمق من طيش وتجارب العشرينات.
  
• أفضل سن للأمومة.. أول الثلاثينات هو السن المناسب للإنجاب بالنسبة لدراسات كتير، وخصوصًا الـ34، ومن ناحية التربية فالأم بتبقى أكتر وعي ودراية بالحياة وقدرت تحدد أولوياتها وهي حابة تربي أولادها على إيه وإزاي.
  
  
• علاقات عاطفية بعيدة عن أميرات ديزني.. حياتك العاطفية بتبعد عن حكايات الفارس والحصان الأبيض وبتتجه ناحية العقلانية وبالتالي بتكون علاقات مستقرة أكتر لأنها واقعية.